ایراندا تورک کیملیغینین سیاساللاشماسی

گئچن گونلرده عزیز دوستوم سایین آتا شاهیدین، سون یازدیغی کیتابی اوخودوم. کیتابی ایلک گؤردویوم‌ده کتیابین عنوانی‌نا دایاناراق آجیماسیز شکیلده تنقید ائتدیم. سایین آتا شاهید ده، اوخویون سونرا دانیشاریق دئدی. اوخودوق‌دان سونرا، بوتون اؤن یارقی‌لاریم ده‌ییشدی. و کتابین محتواسی ایله عنوانی‌نین هیچ ارتباطی اولمادیغینی آنلادیم. کتابین محتواسی، گونئی آذربایجان ایله ایلگی‌لی چوخ ده‌یرلی بیلگی‌لر و اینجه‌له‌مه‌لر سونماقدادیر، یازارین قلمینه ساغلیق دئییب، اوخوماسینی بوتون دوستلارا توصیه ائدیرم، سفارش لینکینی ده کامنت‌لره قویاجاغام.

من ندن کیتابین عنوانی‌نین یانلیش اولدوغونو دوشونورم؟ چونکو ایرانداکی تورکلر، ایران تورکلری ویا بونا بنظر آدلاردا بیر توپلومون وار اولدوغونو دوشونمورم. گونئی آذربایجان تورکلری، قاشقای تورکلری، خوراسان تورکلری، تورکمن‌لر کیمی توپلوملاری بیر تاباغا قویوب، اونلاری اورتاق بیر سوسیال آراشدیرمایا تابع توتماق یانلیشدیر. قاشقای‌لار، تورکمن‌لر، آذربایجان تورک‌لری و خراسان تورک‌لرین‌ده کیملیک مجادله‌سی و سیاسیاللاشماسی تماما فرقلی سوره‌ج‌لردن گئچیب و گئچیر. یا بوتون دنیا تورک‌لرینی آراشدیراجاقسان، یا دا هر بیرینی آیری آیری آراشدیراجاقسان.

کیتابی اخودوقدان سونرا گؤردوم کی یازار دا منیم ایله عینی دوشونوب و بوتون کیتابدا یالنیز گونئی آذربایجان تورک‌لرینین کیملیک مجادله‌سی‌نی یازیب و اینجه‌له‌ییب‌دیر و چوخ دا گوزل یازیب و اینجه‌له‌ییب. حتی کیتابین گیریش بولومونون سون پاراگرافین‌دا بئله یازیر:

Bu Kitapta Güney Azerbaycan Türklerinin İslam Cumhuriyeti döneminde kimlik ve eşitlik mücadelesinin sosyolojik temelleri ve tarihsel gelişimi ele alınmaya çalışmıştır

کیتابین محتواسی گونئی آذربایجان ایله ایلگیلی‌دیر، آما باشلیغی ایرانداکی تورکلردیر. بیرده کتابین ایچینده یئر یئر گونئی آذربایجان ایله ایلگیلی بیر شئی آنلاتیلدیقدان سونرا، ایران تورک‌لرینه بسط وئریلمیش یاماق کیمی جمله‌لر گؤروروک. کیتابین هیچ بیر یئرینده قاشقای‌لار، خوراسان تورکلری، تورکمن‌لر و … ایله ایلگیلی بیر اینجه‌له‌مه یوخدور. یالنیز کیتابین سونوندا، بیر نچه صفحه‌لیک پیوست وار و اورادا اونلارین یاشادیغی جغرافیا و نفوس‌لارینی آنلادیر. بو کیتابین دوغرو آدی “گونئی آذربایجان تورک‌لرینین سیاساللاشماسی” اولمالی‌دیر، اما اولمامیش، نه‌دنی ایله ایلگیلی هیچ بیر فیکریم یوخدور.

سون اولاراق 2 نکته داها دئییم:

1- کیتابین بیر بخشی ایران تاریخینه آیریلیب و تماما رسمی و اویدورولموش ایران تاریخی اورادا تکرار اولوبدور. سانکی 2500 ایل بوندان اؤنجه‌دن ایران دیه بیر اؤلکه وارمیش، آرا سیرا فرقلی شاهلار گلیب گئدیب و بو گونکو جمهوری اسلامی‌یه یئتیشیبدیر. منجه تاریخ بؤلومو تورک و آذربایجان گوزو ایله روایت اولونسایدی چوخ داها فایدالی اولوردو، یادا هیچ بو بخش اولماسایدی داها یاخشی اولوردو

2- کیتابین سون بؤلومو یعنی ایرانی نئجه بیر گه‌له‌جک بک‌له‌ییر بؤلومون‌ده، یئنه ده گونئی آذربایجان میللی حرکتینی نئجه بیر گه‌له‌جک بک‌له‌ییر قونوسو اله آلیب، ایکی یول پیش بینی ائدیب‌دیر. بیریسی غیر فارس میللیت‌لر ایله بیرلش‌مک، دیگری حاکمیت ایله بیرلش‌مک. منجه ان اؤنم‌لی‌سی یعنی تماما تورک کیملیغینه ساریلیب، غیر تورک میللیت‌لردن آیریلیب، تورک دنیاسینا قووشماق، اوچونجو و داها رئال بیر گه‌له‌جک‌دیر کی اونا اشاره اولونماییب