Solarsa Sula, Böyürse Buda
سُلارسا سولا، بؤیورسه بودا
میوه باغچاسی اولان هر کس بونو بیلیر. بیر اکینجی باخچاسینداکی آغاچلارا نه دشمن اولار نه ده عاشق اولار. اونون اوچون اؤنملی اولان آغاجین میوه وئرمهسیدیر. آغاج میوه وئردیغی مدت اونو کسمز، اونو سووارار، کود وئرر، آما اونون چوخ بؤیومهسینه ده اجازه وئرمز، چونکو بیر حددن چوخ بؤیوسه، اونون میوهسی هم آزالار هم ده توپلاماسی چتین اولار.
ایران ایله آمریکا آراسینداکی حکایه ده بودور. ایران آمریکا اوچون میوه وئرن بیر آغاجدیر سُلارسا سولار، بؤیورسه بودار، آما کسمز. یالنیز میوه وئرمهسه ویا میوه وئرمک امکانی اولماسا کسر.
آمریکا ایرانین اکونومی و سیلاح گوجونو دنگهلی توتمایا چالیشیر، نه زامان ضعیفلرسه سوواریب قول قاناد وئریر، چوخ بؤیودوغونده بوداییر
ایران عراق ساواشیندا بودادیلار، سونرا رفسنجانی زمانیندا، اکونومیسینی سولادیلار. اکونومی بیرآز بؤیودوغونده بیر طرفدن تحریم ایله اکونومیسینی بودادیلار، اوبیری طرفدن عراق، سوریه، لبنان، یمن، افغانستان و … یئرلرده ایرانا آلان آچاراق عسگری گوجونو سولاییب، گوجلندیردیلر. بو گون ده اکونومیسی ضعیفلهییب، عسگری گوجو چوخ بؤیویوبدور، اونون اوچون عسگری گوجونو بوداییب، اکونومیسینی سولاماق ایستهییرلر.
بو آغاج هله صاحبلرینه میوه وئریر و کیمسه اونو کسمز. اونون کسیلمهسینی ده گؤزلهینلر چوخ گؤزلر
ایران یالنیز 2 شرطده آمریکا و باتییا فایداسیز اولابیلر و او زامان اونو کسمک ایسترلر یوخسا عمر بویو ائله بوجور اؤلمه-دیری شکیلده حیاتینا دوام ائدهبیلر:
1-ایران تماما چینین کنترلونا گئچه
2-ایراندا ایچ قاریشیقلیقلار اولا، جمهوری اسلامی ایچریده اوتوریتهسینی ایتیره و هر بؤلگه کنترولونو اؤز الینه آلا، یعنی بیر فشل دولت(Failed State) دورومونا دوشه
سون اولاراق بونو وورقولامالییام کی دونیادا هر شئی آمریکانین ایستهدیغی کیمی اولمور. دنیادا آمریکا و بؤیوک گوجلره راغما بیر چوخ دهییشیکلیکلر اولور. گونئی آذربایجانین سرنوشتی و جمهوری اسلامینین سرنوشتی ده بؤیوک گوجلرین ایستکلریندن داها چوخ میللتلرین ارادهسینه باغلدیر
Bir yanıt yazın