آذربایجان خالقی حسابلاشمایی بیلدیغی کیمی حلاللاشمایی دا بیلیر. منه گؤره کریم باقری، ایگید بیر انساندیر و فاشیزمه قارشی سسسیز قالماغی بیلگیسیزلیغیندندیر. اومود ائدیرم، اویانار و اؤز خالقینا دؤنر. اؤز خالقینا دؤنوب حلاللاشیرسا، گونئی آذربایجانین وفالی خالقی یئنه ده اونو باغرینا باسیب سئور.
هر حسابلاشما آجی اولار، آما بیر میللت حسابلاشمایی باشارماسا حلاللاشمایی دا باشارماز، چونکو حسابلاشمادان حلاللاشماق اولماز. گؤروندوغو کیمی گونئی آذربایجان میللتی یاواش یاواش حسابلاشمایا باشلاییبدیر. بو آجی اولسادا چوخ مبارکدیر. ایچ حسابلاشما اولماسا، خارجی دشمنه قارشی گلیب شکست وئرمک اولماز.
بو بیر باشلانقیجدیر، بو حسابلاشما دوام ائدهجک و اؤز خالقینا دوشمانلیق ائدن سیاسیتجیلره و ایش آداملارینا دا یئتیشهجک. اؤز خالقینی ساتاراق، مقام و مالا یئتیشمک بو قدر اوجوز اولمامالیدیر. آذربایجانین چؤرهیینی یئییب آذربایجانا قارشی دشمنلیک ائدنلر بوندان سونرا بیر دفعه دهییل، 10 دفعه دوشونمهلیلر، چونکو بو ایش بوندان سونرا بو قدر اوجوز اولمایاجاق. هر کس بیلمهلیدیر کی خیانتین بهانهسی اولماز، بدلی اولار.
آذربایجاندان چیخیب، آذربایجان خالقینا، وطنینه، هویت و فرهنگینه دشمنلیک ائدنلره بوندان سونرا هیچ بیر یئرده راحات اولمایجاق، کوچه-خیاواندا، میتینگ و کنفرانسلاردا، یعنی آذربایجان خالقینین قارشیسینا چیخدیقلاریندا، ساتقین و شرفسیز شعارلارینی ائشیدهجکلرینی ایندیدن بیلسینلر.
Bir yanıt yazın