بیر همکاریم وار، چوخ یوخسول آما ولخرجدیر. گئچنلرده بیر نئچه دفعه املاک و آلیشوئریش سایتلاریندا، میلیون دلارلیق ویلالارا، سون مدل ماشینلارا و … باخدیغینی گؤردوم. شوخلوقلا سوروشدوم؛ ویلا آلماق ایستهییرسن؟ چوخ جدیتله دئدی؛ ندن اولماسین؟! بیرآز صحبته گیردیم، چوخ جالب بیر شئی دئدی، دئدی من هر ایلین باشیندا بیر پیانگو بیلیتی آلیرام و هر دفعه، پیانگونون منه چیخاجاغینا اینانیب، بیر ایل اؤزومو زنگین حس ائدیرم، اونون اوچون تک فیکریم پیانگو چیخدیقدان سونرا نهلر آلاجاغیمی و نهلر یاشایاجاغیمی دوشونمکدیر.
اینسانین بئینی چوخ عجیبهدیر. اینسانین اؤز بئینی، اؤزونو آلداتا بیلر. بو علمده اثبات اولونموش بیر شئیدیر. بعضا انسان ایستهدیغی وضعیته یئتیشمهغین چوخ چتین اولدوغونو آنلاییب، باشارا بیلهجهییندن اومودونو کسدیغینده، بئیین آرایا گیریب، او وظیفهدن قاچماق اوچون چوخ منطقلی بهانهلر اویدورار. حتی خیالدا اونو باشاریلی بیر شکیلده یئرینه گتیرمیش کیمی گوستریب، وجدان راحاتلیغی ساغلار. انسان دا، بو فانتزینی گرهچک سانیب، وظیفه اوچون چالیشدیغینی حس ائدر، آما اصلینده اونون بوتون تلاشی، هدفدن سونراکی خیاللارا صرف اولار و هدف اوچون هیچ بیر ایش گؤرمز. بو بئینین بیر مدافعه مکانیزمیدیر و اونا منطقلی بهانهلرله وظیفهدن قاچما داورانیشی یا دا تورکیه دیلی ایله “میش گیبی یاپماق” دئیرلر.
متاسفانه نئچه ایلدیر میللی فعاللار آراسیندا دا بو مشکل گؤرونمهیه باشلاییبدیر. ایللرجه عمرونو میللی حرکته وئرمیش میللی فعاللارین بیر چوخو، بو بئیین آلداتماسینین تورونا دوشوبلر. میللی حرکتین اصیل هدفی یعنی میللی دولتین قورولماسی دیشیندا، هر شئیین مجادلهسینی ائدیرلرمیش کیمی گؤستریب، آما اصلینده هیچ بیر شئییین مجادلهسینی ائتمیرلر. خیالی بیر ظفر دؤنگوسونده چیرپینیب دورورلار.
بو کور دؤنگونون باشلانقیجی، یولون نه قدر چتین اولدوغونو آنلادیقدان سونرا یارانان اومودسوزلوق و چارهسیزلیق حسیدیر. ایللرجه حیاتینی قویوب، میللی هدف اوچون چالیشان فعالین ساغلام بیر ویزیون و یول پلانی اولمایینجا، گونئی آذربایجانین میللی دولتینین قورولماسی و استقلالی، اونا چوخ چتین و امکانسیز کیمی گؤرونمهیه باشلار. بو دا باشاریسیزلیق قورخوسو، اضظراب و درین بیر اومودسوزلوق دویغوسو یارادار. بو دویغولار یاراندیغیندا، بئیین آرایا گیرر و بو منفی حسلردن قاچماق اوچون عاغیلا باتان آما اشتباه بهانهلر یارادار. بو شکیلده، میللی فعالیمیز اساس وظیفهدن(میللی دولت قورماقدان) قاچینیب، داها اهمیتسیز یا دا داها کئیفلی و غرورلاندیریجی فعالیتلرله مشغول اولار. حتی ایچینده، اصیل هدفه گئدن یول و اصیل هدف اوچون چالیشانلارا قارشی بیر دیرهنیش ده یارانار. چونکو اونون ذهنینده او هدف راحتدیر، اهمیتسیزدیر، ضررلیدیر یا دا او هدفه چوخدان یئتیشیلمیشدیر(و جیبدهدیر ). او داها بؤیوک و اهمیتلی وظیفهلرله مشغول اولدوغونو سانار. فرصتلری یاخالاییب، پراتیک پلانلارلا، میللی دولتین قورولماسی اوچون فعالیت ائدنلری ده، کیچیک هدفلر اوغرونا چالیشان دایاز دوشونجهلی انسانلار کیمی گؤرر. حتی بعضیلری خود تخریبییه بئله باشلار. یعنی بئینینین ناخودآگاهی، باشاریسیزلیغینا اؤنجهدن بیر بهانه یارادماق اوچون، قصدلی بیر شکیلده باشاری شانسلارینی دا تخریب ائتمهیه چالیشار.
منه بئله گلیر کی، بعضی دوستلاریمیز بو سببدندیر کی، آشاغیداکی منطقلی آما یانلیش بهانهلرله، اساس وظیفهدن قاچیب، داها اؤنملی شئیلر اوچون چالیشیرلارمیش کیمی گؤسترمک پئشیندهدیرلر.
1- گونئی آذربایجانین میللی دولتینی قورماق، چوخ راحتدیر و ذاتا جیبدهدیر بهانهسی ایله،
– میللی دولت قورولدوقدان سونرا اونون آنایاساسینین نه اولاجاغینی دوشونوب، آنا یاسا یازمایا چالیشیرلارمیش
-دولتچیلیک و گئچیش شوراسی یارادیب، دولت قورولدوقدان سونرا نه ایشلر گؤرهجکلرینی تارتیشیرلارمیش
-استقلال بیانیهسی اوخویوب، باشقا اؤلکهلری گونئی آذربایجانین باغیمسیزلیغینی تانیماغا چاغیرارلارمیش
-پزشکیانی گونئی آذربایجانین ائلچیبیی ائتمهیه چالیشیرلارمیش
2- گونئی آذربایجانین میللی دولتینی قورماق، اهمیتسیز و کیچیک بیر هدفدیر بهانهسی ایله،
– ایرانین تمامینی بیر تورک دولتی ائتمک اوچون چالیشیرلارمیش
-داها بؤیوک بوتوو آذربایجان قوراجاقلارمیش
-توران قوراجاقلارمیش
-حتی آمریکانین درین دولتی و دلارین حاکمیتینی قالدیراجاقلارمیش کیمی فعالیت ائدن میللی فعاللار وار
3- گونئی آذربایجانین میللی دولتینی قورماق، ضررلیدیر بهانهسی ایله
-میللی دولت قورارساق، قان آخار، انسانلار اولرمیش دییه، انسان سئور و باریشجیل فعالیت ائدجکلرمیش
-میللی دولت دیکتاتورلوغا سبب اولارمیش دییه، دموکراسی اوچون ساواشاجاقلارمیش
-خالقیمیز میللی دولت و باغیمسیزلیق ایستهمیرمیش دییه، بو سیستمده بعضی حقلره چاتماغی ساغلایاجاقلارمیش
