میلتین اومودونو جانلاندیران قهرمانلیقلار، میلتین قلبینده دستان اولار. قهرمانلیق قیلینج ایله دهییل، چیگینلرینده مسئولیت داشییاراق اگیلمزایراده ایله یازیلار. قهرمانلیق ان چتین زاماندا بئله دوغرو ایشی گورمک جسارتیدیر، هرکسین قاچتیغی یئرده دورا بیلمکدیر. بعضی قهرمانلارین دوروشو ائله پارلاق اولور کی بیر چوخلارینین گؤزونو قاماشدیریر.
حیاتینی میللتی اوچون اورتایا قویان هر میللی فعال بیر قهرماندیر. اؤز میللتی اوچون زندانلارا دوشن هر میللی فعال بیر قهرماندیر. زنداندا بئله عدالتسیزلیکلره قارشی ان سون سلاحینی یعنی بدنینی سیپر ائدیب اعتصاب ائدن جانلاریمیزین هر بیری بیر قهرماندیر. بوتون تهدیدلره باخمایاراق زندانین قاباغیندا اولاد نوبتی توتان انسانلاریمیزین هر بیری بیر قهرماندیر. توتولاجاغینی بیله بیله، سوروملولوق اوستونه آلیب، سینهسینی سیپر ائدیب، دیک دوروشو ایله میللته اومود اولان عباس لیسانی و دوستلاری دا بیر قهرمانلیق آبیدهسیدیرلر. اونلارین بو قهرمانلیغی ائله پارلاقدیر کی بعضیلرینین گؤزونو قاماشدیریر.
