هندوستانین استعمار دؤنمینده، دوز استحصالی، دوغو هندوستان کمپانیسینین انحصاریندایدی. 1930 دا ماهاتما گاندی، بونو بهانه ائدهرک، 390 کیلومتر اوزاقلیقدا اولان هند اقیانوسونا دوغرو بیر یوروش باشلاتدی. یوز مینلرجه انسان دا یولدا اونا قاتیلدی. اورایا یئتیشدیکدن سونرا، ساحیلدکی دوز چامورلارینی دنیز سویوندا قاینادیب، دوز استحصال ائتدی و او دوزلاری یولداشلاری ایله پایلاشاراق دوز قانونونا قارشی چیخدی. بو باشاریلی حرکتده 60 مین نفردن چوخ توتوقلانیب زندانا دوشدو آما هندوستان میللی حرکتینده بیر دؤنوش نقطهسی اولدو. گاندینین هدفی دوستلارینا بیراز دوز وئرمک یا دا دوز قانونو لغو ائتمک دهییلدی. او بو ساده حرکتله، بوتون هندلیلرین اورتاق دردی اولان دوزا دایاناراق، عمومی بیر اویانیش یاراددی. گاندی بو شکیلده خالقی هیجانلاندیریب، ظفر حسی و اومود یاراداراق، هندوستان میللی حرکتینه قاتیلمالارینی ساغلادی.
بیر میللی حرکت اوچون هر مشکل و حادثه، میللی هدفه دوغرو بیر فرصتدیر. هر فرصتی هدفه یئتیشمک اوچون استفاده ائتمک بیر اردمدیر. دالقالارا قاپیلیب، بوشا چیرپینماق دا ان بؤیوک آفتدیر. بیر میللی فعال اولاراق نه ائتمهلیییک سوروسونون جوابی دا ائله بودور.
هر دولتسیز میللتین میللی حرکتی کیمی، گونئی آذربایجان میللی حرکتینین ده هدفی میللی دولتدیر. میللی دولتیمیز قورولانا قدر، یالنیز اونا تمرکز ائدیب، اونا چاتماق اوچون مجادله ائتمهلیییک. آتدیغیمیز هر آددیم و سؤیلهدیغیمیز هر سؤز، بیزی بو هدفه یاخینلاشدیرمالیدیر.
گونئی آذربایجان تورکلری کیچیک بیر اقلیت دهییل. بو میللت بیر شئیی ایستهسه اونا یئتیشه بیلر. یعنی میللت حاضر اولسا، فارس حاکمیتینی بوراخین، دونیا گلسه بئله بو میللتین قارشیسیندا دورا بیلمز. بونون اوچون ده هر حرکتیمیز و فعالیتیمیز بو دوغرولتودا اولمالیدیر، اویانمامیشلاری اویاندیریب، اویانمیشلاری شبکهلندیریب سفربر ائدهرک، بویوک عصیانا و گونئی آذربایجانین کنترولونو اؤز الینه گئچیرمهیه حاضیرلامالیییق.
ساواش، سئچیم، تحریم، معیشت و دموکراسی اعتراضلاری، دوغال آفتلر، اورمو گؤلو، تاریخی اثرلرین تخریبی، فعاللارین توتولماسی، عدالتسیزلیکلر، تحقیرلر و … کیمی فرصتلرده، ایدئولوژیمیزی بیرکنارا بوراخیب، هدفه تمرکز ائدیب دوغرو بیر حرکتله، اویانمامیشلاری اویادیب، اویانمیشلاری سفربر ائدیب بؤیوک عصیانا حاضرلامالیییق. بونون اوچون ده، نه بویوک دستکلره احتیاجیمیز وار، نه ده آغیر ژئوپولوتیک تحلیللره.
Bir yanıt yazın