میللی دولت و باغیمسیزلیق می، یوخسا دموکراسی می؟ بیزیم هدفیمیز گونئی آذربایجان میللی دولتی اولمالی می، یوخسا بو دیکتاتور رژیمی یئخیب یئرینه داها دموکراتیک بیر حکومت قورماق اولمالی می؟ گونئی آذربایجانین خوشبختلیغی اوچون هانکیسینا احتیاجیمیز وار یا دا هانکیسی داها اهمیتلیدیر؟ ایران رژیمی داها دموکرات بیر رژیم اولسا بیزه یئتمز می؟ او زامان ندن گونئی آذربایجان میللی حرکتی وار کی؟ بیز ده ایرانین اوپوزیسیونونا قاتیلیب جمهوری اسلامینی دهییشمهیه چالیشساق، سونرا دموکراتیک ایراندان گونئی آذربایجان دا اؤز پایینی آلسا داها یاخشی اولماز می؟باغیمسیز اولوب بیر دیکتاتور رژیم قورولاجاقسا، جمهوری اسلامیدن سونراکی دموکراتیک بیر ایراندا یاشاماق داها یاخشی اولماز می؟
هر استثمارچی، سؤموردوغو خالقلاری کنترل آلتیندا توتماق اوچون، اونلارین دوشونجهلرینی هدف آلیب، استثمارچینین اونلار اوچون بیر فایدالی نعمت اولدوغو ذهنیتینی یارادمایا چالیشار. چونکو مستعمره خالقلار، استثمارچییا اومود باغلاسا، کؤلهلیغینی بیر مزیت بیلر و آزادلیق ایستهمز.
فارس استعمارینین ده اصیل هدفی بودور؛ بیر آذربایجانلی تورک نه اولورسا اولسون آما اؤزو اولماسین. ایستر حاکمیتین طرفداری اولسون، ایستر اونون اوپوزیسیونونون بیر پارچاسی اولسون، یئتر کی اؤزو اولماسین، یعنی آذربایجان یا دا تورک اولماسین. بونون اوچون هر جور اؤزونه دونوش و اؤز بئینی ایله دوشونمهیه مانع اولمایا چالیشارلار. استثمار ائتدیی خالقین اؤزونه دؤنمهسینه مانع اولماق اوچون ده ان گوجلو شئی پروپاگاندادیر. پروپاگاندا ایله یارانمیش اومود ایشیقلارینی سؤندوروب، اؤزونه دؤنمهیی فایداسیز و یانلیش بیر شئی کیمی گؤسترمهیه چالیشیرلار. ایرانچی سیستم(حاکمیت و اوپوزیسیون)، الیندهکی پروپاگاندا امکانلاری ایله، اؤنجه بیزه آلتداکی پیش فرضلری دایادیر، سونرا دا او پیشفرضلره دایاناراق، اوستدهکی سورولارلا، اوزوموزه دؤنوش و میللی حرکتیمیزین اومودلارینی سؤندورمهیه چالیشیرلار:
1- دموکراتیک بیر ایراندا، گونئی آذربایجان تورکلری بوتون میللی حقلرینه یئتیشه بیلرمیش
2- جمهوری اسلامی ییخیلیرسا اونون یئرینه دموکراتیک بیر سیستم قورولاجاقمیش
3- گونئی آذربایجان باغیمسیز اولسا دیکتاتور و یوخسول بیر اؤلکه اولارمیش
بو کور دؤنگونو قیرماق اوچون و او سورولارا جواب وئرمک اوچون، بو پیشفرضلرین نه قدر یانلیش اولدوغونو خالقیمیزا گؤسترمهلیییک. بو پیشفرضلرین یالنیش اولدوغونو آنلادیغیمیزدا، او سورولارین دا نه قدر یئرسیز اولدوغونو آنلامیش اولاجاییق. بو پیشفرضلری ایکی باشلیق آلتیندا تارتیشمایا آچمایا چالیشاجاغیم:
1- مرکزی حکومتین دموکراتیکلشمهسی، میللیتلرین میللی حقلرینین وئریمهسینین گارانتیسی اولابیلر می؟
2- باغیمسیز گؤنئی آذربایجانین، دموکراتیک بیر دولت اولما شانسی داها چوخ مو؟ یوخسا، ایرانین دموکراتیک بیر دولت اولما شانسی داها چوخدور؟ حتی ایرانین موجود جغرافیادا هیچ دموکراتیک بیر دولت اولما شانسی وار می؟
بو ایکی قونویو سونراکی بؤلوملرده اله آلاجام، لطفا سیز ده فیکیرلرینیزی بیلدیرین.
Bir yanıt yazın