گونئی آذربایجان میللی حرکتینده، چوخو زامان بو سوال ایله مواجه اولوروق. بو یازیدا بو سوالا جواب وئرمک قصدیم یوخدور. چونکو منه گؤره بو سوال یانلیش بیر سوالدیر، دوغرو سوال بودور کی بیر شخص یا دا بیر میللت نهدن مستقل اولماقدان گئچر یا دا مستقل اولماق اونون اوچون اؤنمسیز اولار؟ بو یازیدا بونو دانیشاجاییق.
امنیتده اولماق، گوجلو اولماق، یاردیم ائتمک و خوشبخت اولماق کیمی، مستقل اولماق دا بیر اساسی ارزشدیر. دنیانین بوتون انسانلاری بو ارزشلری ایچیندن سئوهر. بو ارزشلر اوچون چالیشان هیچ کسدن ده دلیل سوروشماز. سیز هیچ “نهدن خوشبخت اولماق ایستهییرسن؟” سوروشان بیر آدام گؤردونوز مو؟ “نهدن گوجلو اولماق ایستهییرسن؟” سوروشان گؤردونوز مو؟ “نهدن امنیتده اولماق ایستهییرسن؟” سوروشان گؤردونوز مو؟ عینی شکیلده “نهدن مستقل اولماق ایستهییرسن؟” سوالی ده یئرسیز و یانلیش سوالدیر و هیچ کیمدن سوروشولماز. اؤز ائوی، اؤز ائشییی، اؤز الی، اؤز باشی اولماق هر کسین ایچیندن گهلن بیر جهانشمول ایستک و ارزشدیر. فقط بو ارزشلر عینی درجهده دهییل، مثلا بعضی انسانلار امنیت اوچون مستقللیغیندن گئچه بیلر، باخیرسان آدامین قیرخ یاشی وار هله ده آنا باباسینین اوینده یاشاییر، چونکو اورادا رفاه و امنیت وار، مستقل اولورسا رفاهی و امنیتی آزالاجاق. یا دا ترسینه بعضی انسانلار مستقل اولماق اوچون رفاه و امنیتیندن گئچر و اؤز الی اؤز باشی اولور. هر ایکی حالتده ده بو آدام امنیت ایستهمیر، یا دا مستقل اولماق ایستهمیر دیه بیلمریک. او هر زامان هر ایکیسینی ده ایستهییر، فقط بعضا بیری اوچون، اوبیریسیندن گئچیر یا دا او بیریسینی ایکینجی پلاندا توتور.
بیر ملت ده عینی بیر انسان کیمیدیر، اساسی ارزشلر وار، او ارزشلر ده، جهانشمولدور و بوتون میلتلر اوچون دهیرلیدیر. بوتون میلتلر گوجلو اولماغی، امنیتی، رفاهی و مستقللییی سئوهر، فقط عینی درجهده دهییل. مثلا قیتلیقدا اولان بیر میللت، گوجلو و مستقل اولماقدان چوخ، رفاهی سئچر. ایچ ساواش و قتل عام گؤرموش بیر میلت، امنیت و گوجو، رفاه و استقلالدان داها چوخ سئور. بونلار سوسیولوژیده بیلنمیش بیر وضعیتدیر. گونئی آذربایجان تورکلری ده هر میللت کیمی استقلال و باغیمسیزلیغی سئویر، آنجاق بعضیلری داها چوخ سئویر و استقلالی هر شئیدن داها اهمیتلی بیلیر، بعضیلری استقلالی داها آز اهمیتلی گؤرورور.
ایندی گهلک اصیل سوالیمیزا: بعضی گونئی آذربایجانلیلار، هانسی ارزشلری قوروماق اوچون اؤز استقلال ایستکلریندن گئچیرلر یا دا استقلالی داها اهمیتسیز گورورلر؟
منجه سون یوز ایلده فارس رژیمینین باسقیسی و پروپاگانداسی نتیجهسینده، گونئی آذربایجان تورکلرینین بیر چوخونون دوشونجه مکانیزمینی پوزولوب و یانلیش بیلگیلر ایله اونلاردا آشاغیلیق، بیلمزلیق و باشاریسیزلیق حسی یارادیلیبدیر. ائله کی بیر چوخ گونئی آذربایجان تورکو، گونئی آذربایجانین بیر دولت اولابیلهجهیینه، او دولتین گوجلو اولابیلهجهیینه و اونلار اوچون رفاه، امنیت و اؤزگورلوک گتیرهجهیینه اینانمیر. حتی اونون ترسینه، ایرانین بؤیوک بیر دولت اولدوغو و ایرانین بیر پارچاسی اولاراق گوجلو، مرفه، امنیتلی و اؤزگور اولاجاقلارینا اینانیرلار. اونون اوچون ده گوج، رفاه و امنیت آدینا، مستقل اولماقدان گئچیرلر، یا دا گونئی آذربایجانین مستقللییینه داها آز اهمیت وئریرلر. یوز ایللیک استثمار سیستمی، خالقیمیزی بعضی یانلیش بیلگیلره ایناندیراراق، گونئی آذربایجان تورکلرینی مستقللیک هوسیندن واز گئچیرمهیی باشاریبدیر. خالقیمیزی گونئی آذربایجانین باغیمسیزلیغیندن واز گئچیرمک اوچون هر گون مدیا و رسمی دانیشیقلاردا یاییلان یانلیش بیلگیلردن بعضیلری:
1- گونئی آذربایجان تورکلری بیر میللت دهییل و ایران آدلی بیر میللتین پارچاسیدیر.
2- تورکلر مدنیتسیز، بدوی و باشاریسیز میلتدیر، تاریخ بویو باشاریلاری دا، فارسلارین سایهسینده اولوبدور
3- بیر کشور هر نه قدر بویوک اولسا، او قدر داها گوجلو و داها مرفه اولار
4- گونئی آذربایجانین هیچ بیر زنگینلییی یوخدور، آیریلسا آجیندان اؤلر
5- نفتین و گازین فلکهسینی باغلاسالار، گونئی آذربایجان محو اولار
6- آذربایجان جمهوریتی و ترکیه باشریسیز، دست نشانده، ورشکسته، دیکتاتور و شیطاندیر و گونئی آذربایجان تورکلرینین دشمنیدیرلر
7- ایران دولتی اولماسا کوردلر تورکلری قتل عام ائدهجک
8- گونئی آذربایجان آیریلماق ایستهسه جنگ داخلی دوشهجک و میلیونلار انسان اؤلهجک
9- گونئی آذربایجانین باغیمسیزلیغینی، دنیانین هیچ بیر دولتی، حتی ترکیه و آذربایجان بئله ایستمیر و اونا قارشیدیر
10- …
بیر چوخ گونئی آذربایجان تورکو بئله دوشونجهلره دایاناراق، استقلالدان واز گئچیر، یا دا داها آز اؤنمسهییر، چونکو باغیمسیزلیق اولورسا، امنیتی، رفاهی، گوجو یا دا باشقا ارزشلرینین ضعیفلهیهجهیینی دوشونور. بونو گؤرنهن بیر جوخ انساندا، فکر ائلهییر کی گونئی آذربایجانلیلارین چوخو باغیمسیزلیق ایستهمیر. هیچ دوشونمور کی باغیمسیزلیق بیر جهانشمول ارزشدیر و بو ارزشی دنیانین هر میللتی ایستر.
البته بو یانلیش دوشونجهلری یالنیز ایران رژیمی یایمیر، بعضا میللی حرکته منسوب شخصیتلر و تشکیلاتلار دا، یانلیش و یئرسیز سؤزلر و تنقیدلری ایله بو دوشونجهلرین یاییلماسینا یاردیمجی اولورلار.
بو دوشونجهلرین نه قدر یانلیش اولدوغو بیر باشقا یازینین قونوسو اولابیلر.
