ترامپ بیر دنیا دولتی ویا امپراطورلوغو قورمایا چالیشیر. حتی وار اولان امپراطورلوغونو رسمیلشدیرمهیه چالیشیر دیه بیلریک. چونکو گرچکدن بیر دونیا امپراطورلوغو چوخداندیر قورولوب. بو گون دونیانین هر هانسی بیر اؤلکهسینده، هر هانسی بیر کندینده بئله، انسانلارین سرنوشتی، آمریکا جمهور باشقانینین ایکی دوداغینین آراسینا باغلیدیر. بیرلشمیش میللتلر و ناتو کیمی اؤرگوتلردن ده هیچ بیر خبر یوخدور. هر حادثهده هر کس آمریکانین توتومونا باخیر.
ایلک باشدا ترامپین کانادا گرونلند، پاناما و … پلانی نه قدر کومیک و بلوف کیمی گؤرونسهده، چوخ گئچمهدن بونلارین نه قدر جدی اولدوغونو دا هر کس آنلادی. منجه بونلار ترامپین رویاسی دهییل آمریکانین رویاسیدیر. ترامپ جسارت ایله اورتایا آتیب، نورماللشدیردی.
آمریکا بیر دونیا امپراطورلوغو قورماق ایستهییر، عینی گئچمیش امپراتورلوقلار کیمی. هیچ بیر دولت اونون رقیبی یا دا متفقی اولمایاجاق، هر دولت اونون اداره ائتدیغی دونیانین بیر پارچاسی اولاجاق و هر قونودا سون قراری آمریکا وئرجک کیمی بیر امپراطورلوق. اولسا اولسا بعضی عاصی دولتلر اولا بیلهجک. بو امپراطورلوغو قورماق اوچون ایکی شئییه احتیاجی واردیر و اونلارین هر ایکیسیده بوگون گوندمده:
1- هیچ بیر دولتین اونونلا رقابت ائده بیلمهیهجهیی بیر گوجه صاحب اولمالیدیر. گرونلند، کانادا و پاناما قونوسو بو دوغرولتودادیر. اورالار آمریکایا الحاق اولورسا، هیچ بیر دولت بیر داها آمریکا ایله رقابت ائده بیلمهیهجک.
2- دنیا، آمریکا قارهسیندن اداره اولوناماز، دنیانیی اداره ائدن مرکز، دنیانین مرکزی یعنی اورتادوغودا اولمالیدیر. منجه ترامپ، بونون اوچون غزهیی ایستهییر. فیلیسطینلیلردن بوشالمیش غزهیی، آمریکایا الحاق ائدیب، اورانی دنیانین پایتختی ائدهجک و دنیانی اداره ائدن بوتون قورولوشلارین مرکزینی غزهیه تاشیییب، دنیایا اورادان حکم ائدهجکلر کیمی گورونور
Güney Azərbaycan, tarixin hər çağında öz milli dövləti sayəsində alnı açıq bir millət olaraq var olmuşdur. Azərbaycan Türkləri hər zaman insani dəyərlər, özgürlüklər və ədalətli hakimiyyət qonusunda bölgənin öncü milləti və qonşu xalqlar üçün işıq və ümid qaynağı olubdur. Ancaq son yüz ildə, Güney Azərbaycanın dövlətinin, İran dövlətçiliyi adına qəsb edilib istismar olunması, millətimizə böyük zərərlər vermiş, milli sərvətlərini talan etmiş və gündən-günə maddi və mənəvi baxımdan yoxsulluğa və fəlakətə sürükləmişdir. Eyni zamanda Azərbaycan Türklərinin ədalətli və insansevər dövlətçiliyinin yox olması, bölgənin digər xalqlarının da ümid və işığının sönməsinə səbəb olmuşdur. Necə ki yüz ildir, onlar da bizim kimi, savaşlar, ədalətsizliklər və zülm altında əzilib, dünya mədəniyyətindən, rifahdan və şərəfli yaşam haqqından çox uzaqlaşmışlar.
Fars faşizmi və imperialist güclərin Türk düşmənliyi və bəzi Güney Azərbaycanlı aydınların keçmişdəki yanlış hərəkət və düşüncələri, Güney Azərbaycanın fəlakətinin ən önəmli səbəblərindəndir. Keçmiş yüz ilin təcrübəsinə baxdığımızda, aydınlarımızın daha əvvəl getdikləri yolların çoxunun yanlış nəticələrə səbəb olduğunu görə bilərik. İran adına və İranın demokratikləşməsi yolunda verilən mücadilə və fədakarlıqların hamısı, Güney Azərbaycan xalqının, xoşbəxtliyi yerinə fəlakətinə səbəb olmuşdur. O fəlakətlərə səbəb olan yanlış düşüncə və planlarla davam edərək, o fəlakətlərdən qurtulmaq olmaz. Buna görə də, bugün Güney Azərbaycan milli hərəkətinin hədəfi, İran hökumətini dəyişdirib başqa bir hökumət qurmaq yerinə, yalnız və yalnız öz milli dövlətimizi yenidən qurmaq olmuşdur.
Dövlətimizi işğal edib, bütün imkanlardan məhrum etsələr də, bir millət olaraq var olmağa davam edib, hər fürsətdə, milli dövlətimizi yenidən qurmağa çalışmışıq. Hətta siyasi, sosial və beynəlxalq sahələrdə, özümüzü qurtaracaq yeni imkanlar da yaratmışıq. Bugün bu imkanlar sayəsində, Güney Azərbaycan milli hərəkəti, yəni millətimizin qurtuluş savaşı, hər zamankindən daha çox uğura yaxındır, çünki:
Milli hərəkətimiz, mədəni və ədəbi sahələrdən başlasa da bu gün millətimizin oyanışı sayəsində, siyasi və milli bir dirəniş və mübarizəyə çevrilib, beynəlxalq siyasətə daşınıbdır.
Güney Azərbaycan xalqının çoxu, özəl mədəniyyətə sahib olduğunu anlayıb və sahib olduğu mədəniyyət və vətəndə, müstəqilliyə layiq bir millət olduğu qənaət və siyasi şüuruna yetişibdir.
Artıq Güney Azərbaycan öz Türklüyünə sarılır. Bu gün Türkçülüğün çırpınan ürəyi Təbrizdir, Güney Azərbaycandır.
Güney Azərbaycanda çoxlu sayda milli düşünür və aydın yetişib. Onların çoxu Güney Azərbaycanda yaşayır və milli hərəkətimizə yön verir. Eyni zamanda dünyanın dörd bir yanında, düşüncə mərkəzlərində yer alıb, milli hərəkətimizin nəzəri əsaslarını dərinləşdirib, beynəlxalq siyasətə daxil edirlər.
Güney Azərbaycan artıq irançılığı və İran dövlətçiliyini mənimsəmir və onu öz dövləti kimi qəbul etmir. Millətimiz fikirdə və düşüncədə, İran dövlətçiliyindən qopub, öz taleyini Türklük və Türk dünyasında görür.
Artıq milli mücadiləmizin bayrağı təsbit olunub, Güney Azərbaycan milli fəallarının çoxluğu onu qəbul edib və xalqımız tərəfindən qəbul edilir.
İran dövlətçiliyi ən gücsüz dövründədir. İçəridə xalq tərəfindən dəstəyini və ideoloji bağını itirib, dünyada isə qanunsuz bir terrorçu dövləti statusundadır. Eyni zamanda sanksiyalar, maliyyə və hərbi gücünü zəiflədibdir.
Quzey Azərbaycan Respublikasının uğurları bir örnək kimi gözlər önündədir və millətimiz, Azərbaycan Türk dövləti altında daha rifahlı, daha azad və daha güclü olacağına inanır.
Türk dünyasının birləşməsi və güclənməsi və Türk Dövlətləri Təşkilatının quruluşu, millətimizə güvən verir və aydın gələcəyə ümidləndirib həvəsləndirir.
Bu səbəblərə görə, daha təsirli, cəsarətli və yerə basan addımlarla, strategiya və yol xəritəmizi bəlirləyib, ən qısa zamanda Güney Azərbaycanı qurtarıb, milli dövlətiimizi qurmalıyıq. Yol xəritəmizi bəlirləmək üçün, ortaq hədəfimiz və ilkələrimiz şəffaf şəkildə müəyyən olmalıdır. Hədəfimiz və ilkələrimiz müəyyən olmasa, heç bir fürsəti düzgün dəyərləndirə bilməyəcəyik və hara gedəcəyini bilməyən bir dənizçi kimi, heç bir küləyin bizə faydası olmayacaq. Hədəfsiz və vizyonsuz bir Mücadilə, boşuna zaman keçirməkdir, hərəkətsiz və eyləmsiz düşüncə isə yalnız bir arzu və xəyaldır. Ortak hədəfimiz bəlli olarsa ona çatmaq üçün ortaq strategiyalar və taktikaləri planlayıb, vizyonlu bir şəkildə hərəkətə keçib, dünyanı dəyişdirə bilərik.
Strategiyalar hədəfə çatmağın yolu və rotasıdır, ilkələr isə doğru yolda olduğumuzu göstərən işıqlardır. Hədəfimizə çatmaq üçün, rotamız (strategiyalarımız) varsa, doğru yöndə irəliləmək və yoldan sapmamaq üçün, yolumuzu işıqlandıran dəniz fənəri, kompas, radar və ulduzlara, yəni ilkələrə ehtiyacımız vardır.
گونئی آذربایجان، تاریخین هر چاغیندا اؤز میللی دولتی سایهسینده آلنی آچیق بیر میللت اولاراق وار اولوبدور. آذربایجان تورکلری هر زامان انسانی دهیرلر، اؤزگورلوکلر و عدالتلی حاکمیت قونوسوندا بؤلگهنین اؤنجو میللتی و قونشولاری اوچون ایشیق و اومود قایناغی اولوبدور. آنجاق سون یوز ایلده، گونئی آذربایجانین دولتینین، ایران دولتچیلغیی آدینا غصب ائدیلیب، استثمار اولونماسی، میللتیمیزه بؤیوک ضررلر وئرمیش، میللی ثروتلرینی تالان ائتمیش و گوندن گونه مادی و معنوی باخیمدان یوخسوللوغا و فلاکته سوروکلهمیشدیر. عینی زاماندا آذربایجان تورکلرینین عدالتلی و انسان سئوهر دولتچیلیغینین یوخ اولماسی، بولگهنین باشقا خالقلارینین دا اومود و ایشیغینین سؤنمهسینه سبب اولموشدور. نئجه کی یوز ایلدیر، اونلار دا بیزیم کیمی ساواشلار، عدالتسیزلیکلر و ظلم آلتیندا ازیلیب، دنیا مدنیتیندن، رفاهدان و شرفلی یاشام حقیندن، چوخ اوزاقلاشمیشلار.
فارس فاشیزمی و امپریالیست گوجلرین تورک دشمنلییی و بعضی گونئی آذربایجانلی
آیدینلارین گئچمیشدهکی یانلیش حرکت و دوشونجهلری، گونئی آذربایجانین فلاکتینین ان اؤنملی سببلریندندیر. گئچمیش یوز ایلین تجربهسینه باخدیغیمیزدا، آیدینلاریمیزین داها اونجه گئتدیکلری یوللارین چوخونون یانلیش نتیجهلره سبب اولدوغونو گؤره بیلیریک. ایران آدینا و ایرانین دموکراتیکلشمهسی یولوندا وئریلن مجادله و فداکارلیقلارین هامیسی، گونئی آذربایجان خالقینین، خوشبختلیغی یئرینه فلاکتینه سبب اولموشدور. او فلاکتلره سبب اولان یانلیش دوشونجه و پلانلار ایله دوام ائدهرک، او فلاکتلردن قورتولماق اولماز. بونا گؤره ده، بوگون گونئی آذربایجان میللی حرکتینین هدفی، ایران حکومتینی دهییشدیریب باشقا بیر حکومت قورماق یئرینه، یالنیز و یالنیز اؤز میللی دولتیمیزی یئنیدن قورماق اولموشدور.
دولتیمیزی اشغال ائدیب، بیزی بوتون امکانلاردان محروم ائتسهلر ده، بیر مللت اولاراق وار اولماغا دوام ائدیب، هر فرصتده، میللی دولتیمیزی یئنیدن قورماغا چالیشمیشیق. حتی سیاسی، اجتماعی و بین الملل ساحهلرده، اؤزوموزو قورتاراجاق یئنی امکانلار دا یارادمیشیق. بوگون بو امکانلار سایهسینده، گونئی آذربایجان میللی حرکتی، یعنی میللتیمیزین قورتولوش ساواشی، هر زامانکیندن دها چوخ باشاریا یاخیندیر، چونکو:
• میللی حرکتیمیز، مدنی و ادبی ساحهلردن باشلاسا دا، بو گون میللتیمیزین اویانیشی سایهسنده، سیاسی و میللی بیر دیرنیش و مجادلهیه چئویریلیبب، اولوسلار آراسی سیاسته داشینیبدیر.
• گونئی آذربایجان خالقینین چوخو، اؤزل مدنییته صاحیب اولدوغونو آنلاییب و صاحیب اولدوغو مدنیت و وطنده، مستقیللییه لایق بیر میللت اولدوغو قناعت و سیاسی شعورونا یئتیشیبدیر.
• آرتیق گونئی آذربایجان اؤز تورکلویونه ساریلیر. بوگون تورکچولویون چیرپینان اورگی تبریزدیر، گونئی آذربایجاندیر.
• گونئی آذربایجاندا چوخلو ساییدا میللی دوشونور و آیدین یئتیشیبدیر. اونلارین چوخو گونئی آذربایجاندا یاشاییر و میللی حرکتیمیزه یؤن وئریر. عینی زاماندا دونیانین دؤرت بیر یانیندا، دوشونجه مرکزلرینده یئر آلیب، میللی حرکتیمیزین نظری اساسلارینی درینلشدیریب، اولوسلارآراسی سیاسته داخل ائدیرلر.
• آرتیق گونئی آذربایجان ایرانچیلیق و ایران دولتچیلیغنی منیمسهمیر و اونو اؤز دولتی کیمین قبول ائتمیر. ملتیمیز فیکیرده و دوشونجهده، ایران دولتچیلیغیندن قوپوب، اؤز سرنوشتینی تورکلوک و تورک دونیاسیندا گؤرور.
• آرتیق میللی موجادیلهمیزین بایراغی تثبیت اولونوب، گونئی آذربایجان میللی فعاللارینین چوغونلوغو اونو قبول ائدیب و ملتیمیز طرفیندن قبول ائدیلیر.
• ایران دولتچیلیغی ان گوجسوز دؤنمیندهدیر. ایچهریده خالق طرفیندن دستهیینی و ایدئولوژیک باغینی ایتیریب، دنیادا ایسه مشروعیتسیز بیر تروریست دولتی استاتوسوندادیر. عینی زماندا تحریملر، مالی و عسگری گوجونو ضعیفلهدیبدیر.
• قوزئی آذربایجان جمهوریتینین باشاریلاری بیر اؤرنک کیمی گؤزلر اؤنوندهدیر و ملتیمیز آذربایجان تورک دولتی آلتیندا داها مرفه، داها اؤزگور و داها گوجلو اولاجاغینا اینانیر.
• تورک دونیاسینین بیرلشمهسی و گوجلهنمهسی و تورک دولتلری تشکیلاتینین قورولوشو، میللتیمیزه گووهن وئریر و آیدن گلجهیه اومودلاندیریب هوسلندیریر.
بو سببلره گؤره، داها ائتکیلی، جسارتلی و یئره باسان آددیملارلا، استراتژی و یول خریتهمیزی بلیرلهییب، ان قیسسا زاماندا گونئی آذربایجانی قورتاریب، میللی دولتیمیزی قورمالیییق. یول خریتهمیزی بلیرلهمک اوچون، اورتاق هدفیمیز و ایلکهلریمیز شفاف شکیلده معین اولمالیدیر. هدفیمیز و ایلکهلریمیز معین اولماسا، هییچ بیر فرصتی دوزگون دهیرلندیره بیلمهیهجهییک و هارا گئدهجهیینی بیلمهین بیر گمیچی کیمی، هیچ بیر کولهیین بیزه فایداسی اولمایاجاق. هدفسیز و ویزیونسوز بیر مجادله، بوشونا زامان گئچیرمکدیر، ائیلمسیز و حرکتسیز دوشونجه ایسه یالنیز بیر آرزو و خیالدیر. اورتاق هدفیمیز بللی اولورسا اونا چاتماق اوچون اورتاق استراتژیلر و تاکتیکلری پلانلاییب، ویزیونلو بیر شکیلده حرکته گئچیب، دنیانی دهییشدیره بیلریک.
استراتژیلر هدفه چاتماغین یولو و روتاسیدیر، ایلکهلر ایسه دوغرو یولدا اولدوغوموزو گؤسترن ایشیقلاردیر. هدفیمیزه چاتماق اوچون، روتامیز(استراتژیلریمیز) وارسا، دوغرو یؤنده ایلرلهمک و یولدان ساپماماق اوچون، یولوموزو ایشیقلاندیران دنیز فنری، قطب نما، رادار و اولدوزلارا، یعنی ایلکهلره احتیاجیمیز واردیر.
ایللردی اورتادوغودا بؤیوک اورتادوغو پروژهسی آدلی بیر اویون واردی، ایلک باشدا بو پروژهنین آماجی، مسلمان اؤلکهلرده، معتدل اسلامچی دولتلری بیرلشدیریب(هم ده یارادیب)، تورکیه و اسرائیل یؤنهتیمینده، باتی متفقی بیر بلوک دوزهلتمکدی. سونرالار هر نهدنسه تورکیه بو پروژهدن کنارا بیراخیلدی(بلکه ده ایلک باشدان پلان بویدو) و یالنیز اسرائیل یؤنهتیمینده بیر بویوک اورتادوغو پلانی باشلاتیلدی. تورکیهنی بو پلاندان اوزاق توتماق اوچون ده تورکیه پارچالاناجاقدی و کیچیک بیر تورکیه اولاراق آوروپا بیرلیغینه گیرهجکدی. تورکیه بو پلانی گئج ده اولسا آنلادی، اونا قارشی وار گوجو ایله ساواشدی، چوخ قان ایتیردی، آما قازانماسا دا، ان آزیندان اویونو پات ائتدی.
بوگون اورتادوغونون وضعیتی، یئنی بیر اویونون باشلانقیجیندان چوخ، موجود اویونون بیتیشی و مهرهلرین توپارلانماسی وضعیتینه اوخشاییر. بو چرچیوهده :
1- فتحالله گولنین اؤلومو ایله معتدل اسلام پروژهسی بیتمیش ساییلیر
2- ایرانا وئریلمیش آوانتاژلار گئری آلینیر و ایرانین قول قانادی عرب اولکهلریندن کسیلیر
3- محتمل پکک اؤزونو منحل ائدیب سیلاح بوراخاجاق
4- یمن، لیبی، سوریه و عراق کیمی داغیلمیش دولتلر(failed states) یئنیدن توپارلاناجاق
طبیعیدیر کی اولوسلار آراسی ایلیشکیلرده هر اوینون بیتیشی، یئنی بیر اویونون باشلانقیجینین خبرچیسیدیر. یئنی اوینون نه اولدوغونو آنلاماق چوخ اؤنملیدیر. بویوک اورتادوغو اویونونو بیر داها صفردان باشلایاجاقلار می؟ یوخسا تماما فرقلی بیر اویون باشلایاجاق می؟
İranın siyasi paradiqmasını şəkilləndirən qruplar fərqli yollarla türklərin siyasi fəallığını önləməyə çalışır. Bu doğrultuda islahatçılar və mühafizəkarlar türklərin seçkilərdəki zəfərini sahibləməyə çalışırlar. İslahatçılar Cavad Zərifin rolunu şişirdərək sanki Pezeşkianı Zərif prezident edib və kabineti də o qurur, o yönləndirir kimi göstərməyə çalışırlar. Mühafizəkarlar da Pezeşkianın Xameneyi və hakimiyyətin bir planı olduğunu irəli sürərək onu sahublənirlər. Xaricdəki müxaliflər də Pezeşkianın danışıqlarını və işlərini aşağılayaraq Azərbaycanın bu zəfərini dəyərsizləşdirməyə çalışır. Hər üç qrupun da ortaq hədəfi türkləri ümidsizləşdirərək siyasətin gündəmindən çıxarıb və rasist sistemin olduğu kimi davam etməsini təmin etməkdir
Bu proseslər burayadək dərin təsir buraxıb və mən düşünürəm ki, belə davam edərsə İranın geosiyasi dəyişikliyinə yol açacaqdır. Bunun üçün bu məşəlin sönməməsi lazımdır. Burada milli fəalların üzərinə önəmli vəzifə düşür. Fəallar o üç qrupun propaqanda oyununa gəlməməli, öz uğur və zəfərlərinə sahib çıxmalı və öz modern və demokratik söyləmlərini İranın siyasi paradiqmasının ön planına çıxarmağa çalışmalıdırlar.
بیلیریک کی سئچیملرده گونئی آذربایجان خالقینین چوغونلوغو سئچیمه قاتیلیب پزشکیانا سس وئردی و بیر قیسمی ده سئچیمی تحریم ائتدی. سیزجه سئجیمه قاتیلیب پزشکیانا سس وئرنلرین چوخونلوغو تورکلوک و آذربایجان آدینا قاتیلدیلار می، یوخسا سئچیمی تحریم ائدنلرین چوخونلوغو تورکلوک و آذربایجان آدینا سئچیمی تحریم ائتدیلر می؟ بونون جوابینی بیلمک اوچون اوستون ذکا و بیلگییه احتیاج یوخدور، آپ آچیق گورونن بیر شئی. او زامان گونئی آذربایجان میللی حرکتینین تابانی هانکی کیتلهدیر؟ سئچیمه قاتیلانلار می؟ تحریم ائدنلر می؟ میللی حرکتین تابانی پزشکیانا اوی وئرنلر ایسه، نهدن خارجده اولان میللی فعاللار و تشکیلاتلارین چوغونلوغو میللی حرکتین تابانینا قارشی چیخیر؟ اونلارین تابانی “ایران مرز پر گهن” دئییب سئچیمی تحریم ائدنلر می؟ سیاسی فعالیتین اساسلاری وار و ایلک اساسی، اؤز تابانینا قارشی اولماماقدیر. بونو آنلاماق چوخ چتین می؟
.
عبدلعلیزادهنی هو ائدنلر خامنهای، جمهوری اسلامی و فاشیسمی هو ائتمیردیلر. گونئی آذربایجان و تورکلوغو هو ائدیردیلر. فلاکتلر ایچینده یاشایان خالقیمیزین اومودلارینی هو ائدیردیلر. تورکلوغون حق سسینی هو ائدیردیلر. بونو آنلاماق چوخ چتین می؟ سیز هانکی طرفدهسیز؟ هو ائدنلر طرفینده می یوخسا هو اولانلار طرفینده می؟
.
پزشکیان اؤزونو تورک تانیتان، آتاتورکون “نه موتلو تورکوم دیهنه” سؤزوندن الهام آلیب، اؤز اینانجینا گوره “ آللاها شکر ائدیرم کی منی تورک یارادیب” دئیهن، تورک دیلینه و عادت عنعنهلرینه باغلی اولان بیریدیر. یعنی تام آنلامی ایله بیر تورکدور. تورک اولدغو سیزه یئتمهدی می؟ ندن جمهوری اسلامی کیمی انسانلارین اورگینه و اینانجینا قاریشیب و اونا گوره یارقیلاییرسیز؟ ندن جمهوری اسلامی ایله مخالفتی اؤزونوزه ایدئولوژی و شرف مسئلهسینه چئویریبسیز و اونون اوغروندا، تورکلوک و آذربایجانین میللی منافعینه قارشی دورورسوز؟ جمهوری اسلامینین ان ایدئولوژیک طرفدارلاری بئله، آذربایجان و تورکلوک آدینا اؤز ایدئولوژیلریندن گئچیب پزشکیانا سس وئردیلر، سیز گئچهمهدیز.
.
سیز میللی اویانیش حرکاتی آدیندا اولوسوم اویان باغیریرکن، گونئی آذربایجان میللتی گؤستردی کی چوخدان اویانیبدیر و یالنیز تورکلوک و آذربایجان منافعی آدینا قرار وئریر و سیزی ده اویاتماغا چالیشیر. نهدن اویانمیرسیز؟
سیز گونئی آذربایجان و تورکلوک آدینا فاشیسمه قارشی دیرهنهجکدیز. ندن آذربایجان و تورکلوک اوچون اورگی چیرپینان خالقیمیزا قارشی دیرهنیرسیز؟
سیز آذربایجان و تورکلوغو مرکزه آلیب، استثماره قارشی سیاسی و حقوقی ساواش آپاراجاقدیز. نهدن تورکلوک و آذربایجان آدینا پزشکیانی سئچهن خالقیمیزی یارقیلاییرسیز؟
قاجار امپراطورلوغونون چؤکوشو و ایرانین قورولدوغوندان سونرا، حاکمیت و یؤنتیم، هر زمان فارسلار ویا فارسلیقدا آسیمیله اولموش باشقا میللیتلردن اولان انسانلارین الینده اولموشدور. ایران قورولدوغوندان بری، ملییت و اتنیک مسئلهسی ایله هر زمان قارشی قارشیا اولوب و بیر چوخ سیاسی پولیتیکا و قرارلار، یالنیز ملییت چاتیشماسی و رقابتی اوزهزیندن آلینمیشدیر. آنجاق میللیت چاتیشماسی و پارادایمی هیچ بیر زمان سیاسی آلاندا گوندمه گلمهمیشدی. اسلام دئوریمیندن سونراکی ایلک ایللرده، سیاسی قرارلار عمومیتده شیعی-سنی اساسیندا اولسا دا، رفسنجانی دؤنمیندن سونرا چیپلاق شکلیده مللییت اوزریندن و اؤزللیکله فارس مللییتچیلیغی اوزریندن اولوردی. آما میللیت قاورامی، سیاسی پارادایما گیرمیردی. چونکو حاکمیتین بوتونو فارس میللیتی ویا آسیمیله اولموش باشقا میللیتلردن تشکیل تاپمیشدی. ائله بو فارسچی سیاست نتیجهسینده، 20 ایل ایچینده فارس استانلاری فرهنگ، آموزش و تکنولوژی ساحهلرینده سرعتله ایلرلرکن، باشقا اتنیک بؤلگهلر خصوصا آذربایجان بؤلگهسی عینی سرعتله گئری گئدیردی. آما اسلام جمهوریتینین سیاستی هر زمان ساغ-سول ویا اصلاحطلب-اصولگرا پارادایمی اوزریندن دهیرلندیریلیب آنالیز ائدیلیردی.
.
پزشکیانین آدایلیغی و جمهور باشقان سئچیلمهسی بو پارادایمی دهییشدیردی. آرتیق اصلاحطلب-اصولگرا پارادایمی ایله ایرانین سیاستینی آنالیز ائدیب آنلاماق امکانسیزدیر. بونو ایلک باشدا پزشکیان باشلاتدی، اوزونو اصولگرایِ اصلاحطلب آدلاندیریب، اصولگرا-اصلاحطلب ایکیلمی و پارادایمینین سونونا نقطه قویوب، هر فرصتده “من تورکم” دئدی. بئلهلیکله ایللردیر پرده آرخاسیندا اولان تورک-فارس ایکیلمینی، سیاسی پارادایما چئوردی. اونون آردیندان سئچیملرین بیرینجی توروندا، فارسلار (اصولگرا، اصلاحطلب و تحریمچی سئچمنلر)، ان منفور سیاستچی آما فارس اولان جلیلییی، تورک پزشکیانا قارشی دستکلهدیلر. اونا قارشین سئچیمین ایکینجی توروندا گونئی آذربایجان و تورکلرین چوخونلوغو(اصولگرا، اصلاحطلب و تحریمچیلر) سئچیمه قاتیلیب، تورک پزشکیانا سس وئریب، پزشکیانین قازانماسینا سبب اولدولار. بو گونهدک بو چاتیشمالار بو شکیلده دوام ائدیر، مثلا اردوغانین پزشکیان ایله تلفن گوروشمهسینین آردیندان، حاکمیتین فارس قولو، تهراندا تورک هاوا یوللارینین آفیسینی باغلادی. آردیندان سپاهین “اقلیت مذهبی” آدینا 2 ذرتشتی فارسی، پزشکیانین کابینهسینه سوخماغا چالیشدیغینی گؤردوک.
.
بو سیاسی چالخالانمالاری اصولگرا-اصلاحطلب ویا حاکمیت-اوپوزیسیون پارادایمی ایله آنلاییب آنلادماق امکانسیزدیر. بوندان سونرا ایراندا گئچن بیر چوخ سیاسی حادثهنی، یالنیز تورک-فارس پارادایمینی و چاتیشمالارینی دیققته آلاراق دوغرو شکیلده آنالیز ائدیب، آنلاییب، آنلادا بیلهریک. حتی آذربایجان جمهوریتی چوخ یاخیندا سفارتینی تهراندا آچاجاغینی اعلان ائتدیکدن سونرا، هر کس، حاکیمیتین فارس قولونون بونا قارشی نه ائدهجهغینی دوشونور. یعنی آرتیق انسانلار، پزشکیانین و عمومیتده ایرانین گهلهجک سیاستلرینین چوخونو، یئنی پارادایم ایله تحلیل ائتمهیه چالیشیر. مثلا:
• هیچ کیم پزشکیانین نئچه وزیری اصلاحطلب، نئچهسی اصولگرا اولاجاغیندان دانیشمیر، هر کس پزشکیان نئچه وزیرینی تورکلردن، نئچهسینی فارسلاردان ویا باشقا میللیتلردن سئچهجهغینی دوشونور.
• پزشکیانین فرهنگ وزیری و آموزش وزیری، میللیتلرین حقلرینه اینان بیریلری اولاجاق می؟
• فارسلارین چوخونلوقدا اولدوغو مجلس ایله پزشکیانین مناسبتی نئجه اولاجاق؟
• سپاهین فارس قولو ایله تورک قولو آراسینداکی گیزلی رقابت و چاتیشمالار نه زمان اورتایا چیخاجاق؟
• هانکی استانلارا تورک استاندار، هانکیلره فارس استاندار سئچیلهجک؟
• پزشکیان الهام علیف ایله گؤروشونده تورکجه دانیشاجاق می یوخسا فارسجا دانیشاجاق می؟
• حاکمیتده اولان فارسلار، پزشکیانین ایلک سفرینی بیر تورک اؤلکهیه گئتمهیینه اجازه وئرهجکلرمی؟
پزشکیان، جمهور باشقانی سئچیلمهسینی محض گونئی آذربایجانلیلارین تورکلوک و آذربایجان سئورلیغینه بورجلودور و بونو اؤزو ده کسینلیکله آنلامیشدیر. بو سئچیم ده، گونئی آذربایجان خالقی، بو بولگهنین گرچک صاحبینین کیم اولدوغونو بوتون دونیایا آنلاداراق بیزلره ده بؤیوک درسلر وئرمیشدیر. گونئی آذربایجان میللی حرکتی اولاراق میللتیمیزین بو ظفرینی قوتلایاراق، مئساژینی آلیب، گونئی آذربایجان میللی حرکتینین گهلهجک حرکتلری و استراتژیلری اوچون رهبر ائتمهلیییک:
1. گونئی آذربایجان و تورکلرین، ماسایا یومروغونو ووروب، اویونو اؤز لهینه چئویرمهیه گوجو واردیر.
2. گونئی آذربایجان، یالنیز تورکلوغونه ساریلاراق باشارابیلر و تورک کیملیغی میللتیمیزین ان اؤنملی وارلیغیدیر
3. گونئی آذربایجانین، تورکلردن باشقا هیچ بیر میللتین یاردیمینا احتیاجی یوخدور
4. گونئی آذربایجان خالقی استقلال فکرییه چاتیبدیر، آرتیق نه ایران اسلام جمهوریتینین پروپاگانداسینا آلدانیب، اونون آدایینا سس وئریر، نه ده اوپوزیسیون تشکیلاتلار و اونلارین ایران اینترنشنال و منوتو کیمی مئدیالارینین تحریم چاغریسینا قاتیلیر.
ایران اسلام جمهوریتینین جمهور باشقانلیغی سئچیمینین بیرینجی تورو سونوجلاندی. سئچیمدن اؤنجه، یازدیغیم بو یازینین بیرینجی و ایکینجی بؤلومونده، سئچیملری گونئی آذربایجان میللی حرکتی استراتژیلری چرچیوهسینده اله آلیب، ایلگیلی استرتژیلر چرچیوهسینده نئجه ایلرلهیه بیلهجهغیمیزی اینجهلهدیم. سئچیملین بیرینجی توروندان سونرا بو استراتژیلری بیر داها اله آلیب، هانکی استراتژیلریمیزده هدفه دوغرو بیر آدیم ایلهرلهدیک و هانکی استراتژیلریمیزده باشاریسیز اولدوق ویا گئری گئتدیغیمیزی اینجهلهیهجهیم.
ایران رسمی سئچیم بیلدیریلری نه قدر گووهنیلمز و مهندسی اولموش اولسا دا، اونون دیشیندا باشقا قایناغیمیز اولمادیغی اوچون بو اینجهلهمهده ایرانین رسمی بیلدیریلری قایناق آلینمیشدیر. بو قایناقلارا گؤره:
– ایران گهنلینده 40% قاتیلیم اولموشدور، قاتیلیم اورانی گئچن جمهورباشقانی سئچیم ایله آینیدیر
– پزشکیان ایران گهنلینده 42%، گونئی آذربایجان بولگهسینده 70%دن چوخ اوی آلدی
– خارحده اولان گونئی آذربایجان تشکیلاتلارین تقریبا تمامی سئچیمی تحریم ائتدی
.
بو سئچیمده مشارکت اورانی گئچن سئچیم ایله عینی اولدو. آنجاق بو قاتیلیمجیلارین دا گئچن سئچیم ایله عینی اولدوغو آنلامینا گلمز. گئچن جمهور باشقانی سئچیملری یئرهل سئچیملر ایله برابر اولوردو، یئرل سئچیملرده مشارکت داها چوخ اولدوغو اوچون و سئچمنلر هر ایکی سئچیمه بیر یرده اوی وئرمک مجبوریتینده اولدوقلاری اوچون، جمهور باشقانی سئچیملرینینده مشارکتی چوخالیردی. بو سئچیم، یالنیز جمهور باشقانی سئچیمی اولدوغو اوچون مشارکت 20%-30% آراسی اولاجاغی تخمین ائدیلیردی، آما پزشکیانین آدایلیغینا اجازه وئریلدیکدن سونرا، مشارکت 40% سطحینه چیخدی. یعنی قاتیلیمجیلارین 25%ینی ایدئولوژیک و هر زمان قاتیلان قاتیلیمجیلار و 15%ینین ده تحریمچیلرین تورکلوک و آذربایجان اوچون قاتیلدیغینی وارسایا بیلیریک. گونئی آذربایجان بؤلگهسینده 70%دن چوخ پزشکیانا اوی وئریلدیغی اوچون، ایدئولوژیک قاتیلیمجیلارین دا یاریدان چوخو تورکلوک و آذربایجان اوچون، اؤز ایدئولوزیلریندن و ابراهیم رئیسینین خلفلریندن گئچیب، گونئی آذربایجان و تورکلوک آدینا، پزشکیانا اوی وئرمیشدیر دییهبیلیریک.
باشلامادان اؤنجه بیر داها وورقولامالیام کی بورادا خامنهای نه قدر جلاددیر، جمهوری اسلامی نه قدر دیکتاتور و قداردیر ویا بو رژیمده رفرم امکانی وارمی، پزشکیان نه قدر تورک دوستو ویا دوشمانیدیر ویا جمهور باشقانی اولورسا نهلر ائدهبیلر ویا ائدهبیلمز، سؤز قونوسو دهییل. بئلهسی دوشونجه و سورولار، حالا ایرانا اومودو اولان و ایراندان آذربایجانا بیر فایدا گهلهجهغینی دوشونن ذهنیتده اولابیلر. میللی حرکتیمیز، ایران چرچیوهسینده سورولان بئلهسی سورولاردان گئچیب، یالنیز گونئی آذربایجان میللی حرکتی و خالقینا تمرکز ائتمهلیدیر. گونئی آذربایجان میللی حرکتینین بللی هدفی وار و بللی استراتژیلری دوغرولتوسوندا، فرقلی تاکتیکلر استفاده ائدهرک بو هدفینه یئتیشهجکدیر. سئچیمی تحریم ائتمک، قاتیلماق ویا بیر آدایی دستکلهمک، یالنیز بیر تاکتیکدیر و استراتژیلریمیز دوغرولتوسوندا بیزی هدفه گؤتورن هر بیرینی سئچهبیلیریک. بیر تاکتیکی قوتساللاشدیریب حیثیت و شرف مسئلهسینه چئویرمک ده یانلیشدیر. یعنی هر سئچیمی اؤز کانتئکستینده دهیرلندیرمهلیییک.
بو یازیدا اینجهلهدیغیم استراتزیلر دیشیندا باشقا استراتژیلر ده وار و باشقا دوستلار دا سئچیم ایله ایلگیلی آلدیقلاری قرارلاری او استراتژیلر چرچیوهسینده دهیرلندیرمهلیدیرلر.
1- ایران و ایرانچیلیغین ائگئمن و ایدئولوژیک نفوذونو هر آلاندا چوروت
2- ایران دولتینه چالیشان آذربایجانلیلاردا، ایران حاکمیتینی ضعیفلت
3- گونئی آذربایجان خالقینی سیاسیلشدیر و ائتکینلشدیر
4- حرکتینی قورو
.
1- ایران و ایرانچیلیغین ائگئمن و ایدئولوژیک نفوذونو هر آلاندا چوروت
ایلک بؤلومده اشاره ائتدیغیم کیمی “ایراندا یاشایان خالقلار بیر میللتدیر، اورتاق سرنوشتلری وار و اورتاق دیللری فارسجادیر” جملهسی، ایرانچیلیق تئوریسنین تملیدیر و گونئی آذربایجانین قورتولوشو اوچون، بو تئوری گونئی آذربایجان خالقی آراسیندا چورومهلیدیر. بو سئچیملرده، گونئی آذربایجان میللی حرکتینین بو استراتژی دوغرولتوسوندا بیر چوخ ایلرلهمهسینه شاهد اولدوق: ایلک دفعه، ان شانسلی ایران جمهور باشقانی آدایی، سئچیم سخنرانیسینین تمامینی تورکچه دانیشدی، ایران و دونیا یایین کاناللاری اونو تورکچهدن چئویرهرک ویا آلت یازی ایله یایدی. بو دا فارسجانین اورتاق ویا میللی دیل اولدوغو تئوریسینین چورومهسی اوچون اؤنملی بیر آددیم اولدو. عینی شکیلده ایرانین باشقا بؤلگهلرینده پزشکیانا اوی اورانی %30 سطحینده اولوب گونئی آذربایجان بؤلگهسینده %70دن چوخ اولماسی، ایراندا یاشایانلارین بیر میللت اولمادیغینی و اورتاق سرنوشتلری اولمادیغینی گؤستریب، ایران-آذربایجان ویا تورک-فارسی ایکیلهمینین گوجلنمهسینه یاردیمجی اولدو.
قاتیلیم آچیسیندان باخدیغیمیزدا، بیر آددیم استراتژیک گئریلهمه گؤروروک، چونکو گونئی آذربایجان بؤلگهسی ایله، ایرانین باشقا بولگهلهرینین مشارکت اورانی آشاغی-یوخاری عینیدیر، بو دا گونئی آذربایجان خالقی ایله ایرانین باشقا بؤلگهلرینده یاشایانلارین عینی شکیلده داوراندیغینین و ایران-آذربایجان ویا تورک-فارس ایکیلمینین ضعیف اولدوغونون گؤسترگهسیدیر. بو گئریلهمهنی، گونئی آذربایجان میللی تشکیلاتلارینین تحریم کامپانیاسی و داخلده اتکین فعاللارین سسسیز قالماسی ایله ایلیشکیلندیره بیلیریک. تحریم کامپانیاسی هر زامان یانلیش بیر قرار دهییل، مثلا کوردلر سئچیمی تحریم ائدهرک کردستان استانیندا قاتیلیم اورانینی ایرانین اورتالاماسینین یاریسینا ایندیریب، دونیایا کورد خالقینین ایراندان فرقلیدوشوندوغونون مئساژینی وئردیلر. آما آذربایجاندا تحریم ایله دونیایا او مئساژین تام ترسینی وئردیلر. بورادان منجه گهلهجک سئچیملر اوچون استراتژیک بیر درس چیخارمالیییق:
– تحریم ائدهرک، ایرانین اورتالاما قاتیلیم اورانینین چوخ آلتیندا قاتیلیم اورانی الده ائدهبیلهجهغیز ایسه، میللی حرکت اولاراق تحریم قراری آلالیم.
– سئچیمه قاتیلاراق، ایرانین اورتالاما قاتیلیم اورانینین چوخ اوستونده قاتیلیم اورانی الده ائدهبیلهجهغیز ایسه، میللی حرکت اولاراق قاتیلیم قراری آلالیم.
.
2- ایران دولتینه چالیشان آذربایجانلیلاردا، ایران حاکمیتینی ضعیفلت:
بیرینجی بؤلومده دئدیغیمیز کیمی هر باشاریلی میللی حرکتینین ان اؤنملی استراتژیلریندن بیری، اؤزوندن اولان آما دشمنه چالیشان اولادلارینی، اؤز جبههسینه جذب ائتمکدیر. بو سئچیمده گونئی آذربایجان بؤلگهسینین قاتیلیم اورانی گئچن جمهور باشقانی سئچیملری ایله ائشیت اولدو. گئچن سئچیمده ابراهیم رئیسییه 70% اوی وئریلمیشکن بو سئچیمده ابراهیم رئیسی ایله عینی ایدئولوژی و اونون خلفی اولانلار، توپلام 20%-30% آراساندا اوی آلدی. آما اونلارا قارشی اولان پزشکیان، تورک و آذربایجان سؤیلمی ایله، گونئی آذربایجانلی قاتیلیمجیلارین 70% اویلارینی آلدی. سئچیملره قاتیلانلارین چوخونلوغو، ثابت سئچمنلر اولدوغو و رژیمه ایدئولوژیک باغلی اولان ویا ایران دولتینه چالیشانلار اولدوغونو وارسایاراق، ایران دولتینه چالیشان گونئی آذربایجانلیلارین بیر چوخونودا، تورکلوق و آذربایجانچیلیق دویقولارینین، ایدئولوژیک باغلارینا غالب گلدیغینین و ایران حاکمیتینین اونلاردا ضعیفلهدیغینین آچیقجا گؤرهبیلیریک.
.
3- گونئی آذربایجان خالقینی سیاسیلشدیر و ائتکینلشدیر:
میللی حرکتیمیزین اساس استراتژیلریندن بیری خالقیمیزی آکتیو سیاسته و حرکته گتیرمکدیر. سئچیم اورتامیندا نسبی اولسا دا، آز هزینه ایله خالقیمیز میللی مفکوره ایله هیجانا گهلیب سیاسیلشدی و اؤز سرنوشتینه دویارلی و ائتکیلی اولماغی ساغلاندی. پزشکیانین ستادلاریندا و میتینگلرینده میللی شعارلار سسلندی، تورک دیلی و آذربایجان، ایستکلر و وعدهلر لیستهسینین باشیندا یئر آلدی. پزشکیانین تبریزده تماما تورکجه دانیشماسی، ایران میللی مارشینین چالینماسینا اجازه وئریلمهمسی و آذربایجان مارشلارینین چالینماسی، گونئی آذربایجان خالقینی تورکلوک و آذربایجان قونوسوندا حساسلاشدیرب، بو قونویو سیاسی میدانلارا چیخاردی.
,
4- حرکتینی قورو:
هر سیاسی فعال ویا تشکیلات، حرکتینی و تابانینی، یعنی پایگاه اجتماعیسینی قورومالیدیر. تورکلوک و آذربایجان سئورلیک، حرکتیمیزین تهمل داشیدیر و بونو هر شئیدن اوستده توتان کیتله، میللی حرکتیمیزین تابانیدیر. بو سئچیمده هم دوشونجه اولاراق جمهوری اسلامی طرفدارلاری، هم ده جمهوری اسلامییه قارشی اولان کیتلهنین بیر بولومو، تورکلوک و آذربایجان آدینا، جمهوری اسلامی لهینه ویا علیهینه اولان دوشونجهلریندن گئچیب، پزشکیانا اوی وئردیلر. منجه گونئی آذربایجان میللی حرکتینین ان اساس تابانی بونلاردیر، کی تورکلوک و آذربایجان آدینا هر جور ایدئولوزی و باغلیلیقلاریندان گئچه بیلیرلر. بونلار میللی حرکتیمیزین واقعی تابانیدیر. گونئی آذربایجان تشکیلاتلاری و میللی فعاللاری بونلارا صاحیب چیخیب، اونلارین گور سسی اولوب، خالقیمیزین بوتونونو ده اونلار کیمی دوشونمهیه تشویق ائتمهلیدیر. تاسفله گونئی آذربایجان تشکیلاتلاری تورکلوک و آذربایجان سئورلیغی، ایکینجی پلانا بوراخیب، جمهوری اسلامییه قارشی اؤز ایدئولوژیک باخیشلارینی اون پلانا آلاراق، گونئی آذربایجان میللی حرکتینین اساس تابانینا قارشی بیر دوروم سرگیلهدیلر. یعنی گونئی آذربایجانادا تورکلوک و آذربایجان میللی شعورو اولان انسانلارین چوخونلوغو صاحبسیز قالدی و وار اولان گونئی آذربایجان تشکیلاتلارینین هیچ بیری اونلاری تمثیل ائتمیر.
.
سون سؤز:
بو سئچیملر و پزشکیانین آدایلیغی، بویوک بیر فرصتدی. بو سئچیمده گونئی آذربایجان میللی حرکتینین تابانینین چوخونلوغو، اسلام جمهوریتی له ویا علیهینه اولان ایدئولوژیک باغلیلیقلاریندان گئچیب، گونئی آذربایجانین استراتژیک منافعینی قورودولار، آما خارجدهکی گونئی آذربایجان تشکیلاتلار، حمهوری اسلامی علیهینه اولان ایدئولوژیک باغلیلیقلاریندان قوپامادی و گونئی آذربایچان میللی حرکتینین استراتژیک چیخارلارینا قارشی بیر توتوم توتتو. گونئی آذربایجان میللی حرکتی بو فرصتی قوللاناراق چوخ استراتژیک قازانیملار و باشاریلار قازانیب بعضی استراتژیک ضررلر و باشاریسیزلیکلارا اوغرادی. سئچیمی تحریم ائدن تشکیلاتلارین استرتژیک قازانیملاردا هیچ بیر ائتکیسی اولماسا دا، گونئی آذربایجان میللی حرکتینین استراتژیک ضررلر و باشاریسیزلیغیندا، اؤنملی ائتکیلری اولدو.
اؤنوموزدهکی ایران اسلام جمهوریتینین جمهور باشقانلیغی سئچیمینی فرقلی باخیشلار ایله اینجهلهیه بیلیریک. بو یازیدا گونئی آذربایجان میللی حرکتی استراتژیلری چرچیوهسیندن قونویا باخمایا چالیشاجاغام. بورادا اینجهلهدیغیم استراتژیلر، دنیادا باشاریلی میللی حرکتلرین اورتاق استراتژیلریدیر و گونئی آذربایجان میللی حرکتینده ده چوخ زامانلار تشکیلاتلار و میللی فعاللار طرفیندن دیله گتیریلمیشدیر.
باشلامادان اؤنجه وورقولامالیام کی بورادا خامنهای نه قدر جلاددیر، جمهوری اسلامی نه قدر کؤتو و قداردیر ویا بو رژیمده رفرم امکانی وارمی، پزشکیان نه قدر تورک دوستو ویا دوشمانیدیر ویا جمهور باشقانی اولورسا نهلر ائدهبیلر ویا ائدهبیلمز، سؤز قونوسو دهییل. بئلهسی دوشونجه و سورولار، حالا ایرانا اومودو اولان و ایراندان آذربایجان بیر فایدا گهلهجهغینی دوشونن ذهنیتده اولابیلر. میللی حرکتیمیز، ایران چرچیوهسینده سورولان بئلهسی سورولاردان گئچیب، یالنیز گونئی آذربایجان میللی حرکتی و خالقینا تمرکز ائتمهلیدیر. دویقولاریمیزین اسیری اولمادان، میللی حرکتیمیزین هدفی یعنی گونئی آذربایجان میللی دولتینین قورولماسینا بیزی بیر آددیم یاخینلاشدیران و ایلکهلریمیز چرچیوهسینده اولان هر استراتژی و تاکتیکی مباح بیلیب، دوغرو و دیقتلی شکیلده قوللانمالیییق.
1- ایران و ایرانچیلیغین ائگئمن و ایدئولوژیک نفوذونو هر آلاندا چوروت
2- ایران دولتینه چالیشان آذربایجانلیلاردا، ایران حاکمیتینی ضعیفلت
3- گونئی آذربایجان خالقینی سیاسیلشدیر و ائتکینلشدیر
4- حرکتینی قورو
3- گونئی آذربایجان خالقینی سیاسیلشدیر و ائتکینلشدیر:
گونئی آذربایجان تورکلری دولتسیز قالدیغی گئچمیش یوز ایلده بؤیوک ظلملره اوغرامیش، سیخینتیلارا دوشموش و فلاکتلر گئچیرمیش بیر میلت اولدوغو اوچون، میللی فعاللار، تشکیلاتلار و آیدینلارا قارشی گوونسیزدیر و قورتولوشونا دا اومودسوزدور. بو اومودسوزلوق دا، خالقیمیزین دورقونلوغونا سبب اولوب، بؤیوک حرکتلر و حملهلر قابلیتینی آزالدمیشدیر. عینی زاماندا، ایران دولتینین بوتون حکومتلری، بیلینجلی اولاراق خالقیمیزا سیاستین فایداسیز و تهلکهلی اولدوغونو تلکین ائدیب پاسیولشدیریبدیر. اونون اوچون، میللی حرکتیمیزین اساس استراتژیلریندن بیری خالقیمیزی آکتیو سیاسته و حرکته گتیرمکدیر. سئچیم اورتامیندا موقت اولسا دا، آز هزینه ایله خالقیمیزی میللی مفکوره ایله هیجانا گتیریب سیاسیلشدیریب، اؤز سرنوشتینه دویارلی و ائتکیلی اولماغینی ساغلایابیلیریک. بونو هم اکتیو تحریم کامپانیاسی یارادیب خالقیمیزی گونئی آذربایجان مفکورهسی ایشیغیندا سیاسیلشدیرهبیلیرک، هم ده گونئی آذربایجان و تورکلوک آدینا اکتیو قاتیلیم کامپانیاسی ایله ساغلایا بیلیریک.
سئچیملرده هم تبلیغات دؤنمی، هم سئچیم سونراسی پزشکیان چیخارسا خیابانلاردا شادلیق اورتامی، هم ده چیخماز ایسه خیابانلاردا اعتراض اورتامی، گونئی آذربایجان میللی حرکتی اوچون بویوک بیر فرصتدیر. بو فرصتی قوللانیب میللی شعارلار و سمبوللر ایله خالقیمیزی سیاسیلشدیریب حرکته گتیریب، میللی شعورو چوخالدا بیلیریک. بو فرصتی بیز قوللانماساق خارجدهکی اپوزیسون ویا داخلدهکی رفرمیستلر قوللانیب و خالقیمیزا ایرانچیلیق حسی وئرهجکلر، و میللی حرکتیمیز فرصتی یؤنتمهدیغی اوچون بویوک ضررلره اوغرایاجاق و گئری گئتمیش اولاجاییق.
4- حرکتینی قورو:
هر سیاسی فعال ویا تشکیلات، حرکتینی و تابانینی، یعنی پایگاه اجتماعیسینی قورومالیدیر. بیر حرکت و تابان کیتلهسی، اونو تمثیل ائدن سیاسی الیت و تشکیلاتلار طرفیندن دستکلنیب، صاحب چیخیلمازسا، او حرکت و تابان کیتلهیه، باشقالاری صاحیب چیخار و اؤز ایستهدیکلری شکیلده یؤنلندیرر. گونئی آذربایجان میللی حرکتینین سیاسی الیت و تشکیلاتلاری چوخو زامان ایکی بؤیوک یانلیشلیغا دوشور 1) انتلکتوئل اولدوغونو دوشونور و اؤز تابان و خالقینی دوشونمهدن، عاغلینا گهلن هر شئیی دوغرو بیلیب، یاییملاییر 2) اؤزونو گونئی آذربایجان دولتی کیمی بیلیر و گونئی آذربایجان خالقینین چوخونلوغو نه ایستهسه او شکیلده داورانیر. بونلارین هر ایکیسی ده یانلیشدیر. بیر سیاسی فعال و تشکیلات نه انتلئکتوئلدیر کی “بیر یانلیشا بیرمیلیارد انسان اینانسا دا، یئنه یانلیشدیر” دئییب اؤز تابانینی هیچه سایا، نه ده دولتدیر کی بوتون میللتین چوخونلوغونون ایستهیینه اویا. هر سیاسی تشکیلات و فعالین تک بیر گؤرهوی وار او دا تمثیل ائتدیغی تابان و دؤشونجهنی اقتدارا گهتیرمکدیر. عینی شکیلده گونئی آذربایجان میللی حرکتی تشکیلاتلارینین دا، اساس گؤرهوی اؤز تابانینی قورویوب گونئی آذربایجان خالقینین چوخونلوغونو، تمثیل ائتدیغی دوشونجهیه جذب ائدیب، هدفی دوغرولتوسوندا حرکته گئچیریب، میللی دولتیمیزی قورماقدیر.
گونئی آذربایجان تورکلری بیر میللتدیر و بیربیریندن چوخ فرقلی دوشونن انسانلار و کیتلهلر وار، فرقلی دوشونجهلر ایله اسلام جمهوریتینی دستکلینلر وار، مجاهدین خلق، سلطنت طلب و پان ایرانیستلری وار. حتی ملیتچی، تورکچو و آذربایجانچی دئدیغیمیز اینسانلار بئله چوخ فرقلی دوشونجه و طلبلره صاحبدیر. یالنیز آذربایجانین اکونومیسی دوزهلسین ایستهین وار، یالنیز تورک دیلی و کیملیغینی ایستهینلر وار(فرقلی سویهلرده)، یالنیز ایراندا دموکراسی و حقوق شهروندی ایستهینلر وار، ایرانی تماما تورک ائتمک ایستهینلر وار، ایراندا فدرال بیر حکومت قورماق ایستهینلر وار، تورکیه ویا قوزئی آذربایجان ایله بیرلهشمک ایستهینلر وار، آذربایجاندا محلی بیر دولت ویا گونئی آذربایجانین تام باغیمسیز اولماغینی ایستهینلر وار و حتی تام باغیمسیزلیق ایسهینلر آراسیندا بئله فرقلی ائکوللار وار. اؤزونو سیاسی فعال و تشکیلات آدلاندیران بیری، اؤز تابانینی تانیمالیدیر و او تابانی تمثیل ائدیب اونلارین گور سسی اولمالیدیر. بیر سیاسی تشکیلات اؤز پایگاه اجتماعیسی ایله مخالف بیانیه وئرمز. اونلاری صاحبسیز بوراخیب، میللی حرکتیمیزه دشمن دوشونجهلره یئم ائتمز.
ایچهریدن آلدیغیم بیلگیلره گؤره، خالقیمیزین آذربایجان و تورک میللی شعورو اولان بؤلومونون چوخونلوغو سئچیملره قاتیلیب پزشکیانا اوی وئرمهغی دوشونور، اما ایرانچی، سلطنت طلب، مجاهدین ویا شریعتچی دوشونجهیه یاخین اولان گونئی آذربایجانلیلار، سئچیملری تحریم ائتمک ایستهییرلر ویا پزشکیانا قارشیدیرلار. بو بیلگیلره دایاناراق، سئچیمی تحریم ائدن گونئی آذربایجان تشکیلاتلارینا سوروشورام: سیز گونئی آذربایجان دا هانگی دوشونجهنی تمثیل ائدیرسیز؟ نهدن اؤز تابانینیزا صاحیب چیخمیرسیز؟ نهدن حرکتیمیزی قوروماق گؤرهوینی بوراخیب، انتلکتوئل قیلیغینا گیریبسیز؟
