ترند آوجیلیغی؛ بوشلوق، فرصتچیلیک و کیبیرین، ات و سوموگه بورونموش حالیدیر. بیر داوانین معماری اولماق یئرینه، دالقالارین اوستونده اِسکی گئتمکدیر. یئنی بیر حیکایه یازماق یئرینه، ترند اولانی یاخالاییب، باشقالارینین بویوک بدللرله بؤیوتدوغو بیر حرکتین اوستونه چؤکمکدیر. میللی حرکتی، بیر داوا دهییل، بیر گرانت پروژهسی کیمی گؤرمکدیر.
ترند آوجیسی دستک آلماق اوچون، هانکی قاورامین بازاری یاخشی ایسه، او قاورامین پرچمداری اولار. سوسیال مدیادا هانکی هشتگ گوجلو ایسه اونون رنگینه دوشر. بیر گون میللیتچی، سونراکی گون لیبرال، بیر سونراکی گون فمینیست، الجیبیتی یا دا چئورهجی اولار. اونلارین ساواشاجاغی بللی بیر ارزش وهدف اولماز. اونلار نه یئل اکرلر، نه ده طوفان بیچرلر، اونلارین هدفی یئلین آخیشینا اویوب دستک قازانماقدیر.
البته هر سیاستچی و میللی فعال دا، سیاسی و سوسیال ترند و دالقالاری ایزلر کی، اونا گؤره تدبیر آلسین. داواسینا اینان هر سیاستچی، ترندی ایزلر، آنالیز ائدر و اوندان استفاده ائدیب آماجینا دوغرو بیر آددیم ایلرلهمهیی دوشونر. یا دا آماجینا قارشی ایسه او ترندی چورودوب، اونون تاثیرینی آزالتماق اوچون چالیشار. بورادا سؤز قونوسو بو دهییل، سؤز قونوسو دوغرو یا دا یانلیش اولدوغونو دوشونمهدن، میللی هدفه گتیر-گؤتورونو دوشونمهدن، ترندی یاخالاییب اوستونه قونوب اونونلا یوکسلمهیه چالیشان فرصتچی لردن سؤز گئدیر.
بو سیاسی پارازیتلر خالق ایچینده بیر اومود یا دا اؤفکه دالقاسی گؤرسهلر، ههمن او دالقانین اوستونه یاتیب، اؤز مالکیتلرینه گئچیرمهیه چالیشارلار. اؤزلرینی چوخ عاغیللی و منطقلی بیلرلر و حرکتین اصیل صاحیبلرینی عاغیلسیز، باشاریسیز، تندرو، فاشیست و عقب مانده کیمی گؤسترمهیه چالیشارلار. اونلار داوا نهدیر، هدف نهدیر، ایلکه نهدیر بیلمزلر. اونلار بوش چووال کیمیدیرلر، ایستهسهلر ده دیک دورا بیلمزلر. اونلار میللتی قلبلری ایله دهییل، رقملرله حس ائدرلر. مدیا پروپاگانداسیندا هانکی آخیمی گوجلو گؤرسهلر، دوغرو اولوب اولمادیغینا باخمادان، او آخیمین ان آتشلی مدافعهچیسی اولارلار. هر زامان موغلاق، مبهم و چندبعدی دانیشارلار. “هر کس اوچون هر شئی”یین پارتیسی اولارلار. ایستهدیکلرینی آچیق و نئت دئمزلر. آنلامی نئت و بللی اولان اصطلاحلاری ایشلتمزلر. چونکو نئت و شفاف اصطلاحلارلا بیر آتا-بیر نالا وورابیلمزلر. مثلا گونئی آذربایجان اصطلاحینی باشارا بیلدیکلری قدر استفاده ائتمزلر. اونون یئرینه، آذربایجان، ایران آذربایجانی، آذربایجانین گونئییی، آرازین آلتی، ایرانین شمالغربی، ایران تورکلری، ایرانداکی تورکلر و بونا بنزر اصطلاحلاری استفاده ائدرلر. یا دا گونئی آذربایجان میللی حرکتی اصطلاحی یئرینه، آذربایجان میللی حرکتی، تورک میللی حرکتی، گونئی میللی حرکتی، آذربایجان دموکراتیک حرکتی و بونا بنظر اصطلاحلار ایشلهدرلر. هدف اولاراق دا، تکثرگرایی، دموکراسی، حق تعین سرنوشت و عدم تمرکز کیمی پاستوریزه و هر طرفه یوروملانا بیلهجک اصطلاحلاری استفاده ائدرلر. بو اصطلاحلاری دا میللتین حقیقی مشکللرینی حل ائتمک اوچون دهییل، فاند وئرنلرین راپورلارینا اویغونلوق ساغلاماق اوچون استفاده ائدرلر. اونلار خالقین دردلرینی و گهلهجهیینی، باشقالارینا پازارلاماق اوچون بیر “Case Study” گؤررلر.
ترند آوجیلاری گئت گئده، بوشلوق و فرصت طلبلیغی بیر ایش مدلینه چئویریب، سیاسی تاشئرونلوق مرتبهسینه چاتارلار. یعنی یالنیز خالقین آلقیشی دهییل، خارجی محورلرین، لوبیلرین، اولوسلار آراسی سازمانلارین دا آژانداسینا و جیبینه گوز تیکرلر. اونا گؤره ده، ایکی دیللی اولارلار، دیشاریداکیلر اوچون مدرن، باریشجیل و جهانی ارزشلرین مدافعهجیسی کیمی گؤرونوب، فاند آلاجاقلاری دیلده راپور یازارلار. آما ایچریده اؤز خالقلاری ایله موغلاق، دویقوسال و هر یئره چکیله بیلن شعارلارلا دانیشارلار. بو ایکی یوزلولوک سایهسینده، میللی حرکتین دشمنلری یا دا رقیبلری اونلارا عاشق اولارلار. چونکو اونلار ساتین آلینا بیلهجک و یؤنلندیریلهبیلهجک چوخ دهییرلی بیر ابزاردیرلار. اونون اوچون اونلارا میدان آچیب، مئدیا دستکی وئریب، اولوسلار آراسی پلاتفورملاردا سؤز حاققی وئررلر. چونکو اونلارین واسطهسی ایله خالقین حقیقی، بومی و صداقتلی طلبلرینی تحریف ائدیب، حقیقی بیر دیرنیش و مجادلهنی، فاندلاشمیش بیر پروژهیه دؤنوشتوروب، اعتبارسیزلاشدیرا بیلرلر.
ترند آوجیلارینین ان بویوک اشتباهی، خالقی “مانیپوله ائده بیلهجکلری بیر دئیتا مجموعهسی” کیمی گؤرمکدیر. بیر ترندی یاخالاییب گئچیجی بیر محبوبیت قازاندیقلاریندا، اؤزلرینی خالقین چوخ اوستونده گؤرمهیه باشلاییب، “من بو ایشی بیلیرم، هر کسی بارماغیمدا اوینادارام” کیبرینه گیررلر. هر دانیشان و اعتراض ائدهنه ده منیم آرخامدا بو دولتلر وار، بو سازمانلار وار، من سیزین اولاشامایاجاغینیز یئرلر و آداملارلا گؤروشورم، منیم بو قدر فالووئریم وار، چوخ کفرانس و کنگرهلره چاغیریلیرام، دانیشدیغیمدا هر کس منی آلقیشلاییر و … کیمی سؤزلرله هر کسی سوسدورمایا چالیشارلار.
ترند آوجیلاری میللی حرکتین ان ضعیف نقطهسیدیر. گونئی آذربایجان و تورک دشمنلری اونلارین کیبرینی و فرصتچیلیغینی چوخ یاخشی بیلیر. اونلارا بیرآز ترند(مدیا گؤرونورلوغو، اولوسلارآراسی پلاتفورملاردا سؤز حاقی، یالانچی آلقیش و گئچیجی گوج) وئرهرک، اونلاری ملی هدفدن قوپاریب، اؤز خالقلارینا قارشی بیر ترووا آتی کیمی استفاده ائدرلر. فقط بو سونسوزا قدر دوام ائتمز، یا تاریخ مصرفلری گئچر یا دا کیبیر و ایکی یوزلولوکلری اوزوندن، خالق و میللی فعاللارین گؤزوندن دوشوب، خارجی بیر عنصر کیمی گؤرونرلر. بو مرحلهیه یئتیشمیش زاواللی آوجیلار، دستکچیلری طرفیندن ده کنارا قویولار. چونکو هیچ بیر گوج، تاریخ مصرفی گئچمیش و خالقا هیچ بیر تاثیری اولمایان تاشئرونلارلا بوش یئره واختینی مشغول ائتمز.
بو گون گونئی آذربایجان میللی حرکتینه دقتلی باخساق، ترند آوجیلاری، ترندی یاخالامیش، تاشئرون اولموش، کیبیر دؤنگوسونه گیرمیش و سونوندا تاریخ مصرفی گئچیب بیر کنارا آتیلمیش بیر چوخ نمونه گؤره بیلریک.
Bir yanıt yazın