ایراندا باش وئرن آیاقلانمالار دلارین باهالاشماسی و انسانلارین گئچیمینین چتینلشمهسی سببی ایله باشلاسا دا، پهلوی، اسرائیل و آمریکانین قیشقیرتماسی ایله حقیقی هدفیندن جاییب، ارتجاعی پهلوی و مونارشی قورماق آیاقلانماسینا چئویریلدی. بو آیاقلانمالار ایران رژیمینین وحشی قتل عامی ایله دوردورولدو و چوخلو انسانین اؤلومونه، یارالانماسینا و توتوقلانماسینا سبب اولدو.
بو آیاقلانمالارا، گونئی آذربایجان تورکلری بیلینجلی شکیلده قاتیلمادی. گونئی آذربایجان اولاراق ان بؤیوک قازانجیمیز، البته کی خالقیمیزین و جوانلاریمیزین داها آز ضرر گؤرمهسیدیر. گونئی آذربایجان میللی حرکتی اولاراق، دانیشدیغیمیز هر سؤز و توتتوغوموز هر توتومون مسئولیتینی قبول ائتمهلیییک. هامیمیز وطن یولوندا اؤلمهیه حاضیر اولساق دا، بیر هیچ اوچون اؤزوموزو و خالقیمیزی تهلکهیه سالماق حاققیمیز یوخدور. بونو ائتمهیه چالیشانلار دا مسئولیتینی قبول ائتمهلیدیرلر.
بو آیاقلانما و اؤنجهکی آیری حادثهلر گؤستریر کی آرتیق گونئی آذربایجان تورکلری بیر میللت عاغلینا صاحبدیر. آرتیق گونئی آذربایجانین میللی عاغلی و قرار وئرمه مرکزی خارجده دهییل، ایچرده و میللتین ایچیندهدیر. آرتیق گونئی آذربایجان تورکلری بیر میللت اولاراق برابر قرار وئریرلر. خارجدهکی اوپوزیسیونلار و میللی حرکت آدینا اولان تشکیلاتلارین بیانیهلرینه راغما، قاتیلماسی لازم اولان یئرده چوخونلوقلا قاتیلیرلار، لازم اولمایان یئرده ده چوخونلوقلا قاتیلمیرلار. بو بیزی بیر میللت ائدیر. بو میللتیمیز آدینا چوخ بؤیوک بیر باشاری و تشکیلاتلار آدینا چوخ بؤیوک بیر باشاریسیزلیقدیر.
گونئی آذربایجانین بو آیاقلانمالارا قاتیلماماسینین، میللی حرکتیمیز آدینا آیری فایدالاری دا اولدو. بوندان سونرا هم حکومتین ایچیندهکیلر، هم ده اوپوزیسیون گروهلار، ایکییه آیریلاجاقلار. بیر قسمی حقیقتی آز دا اولسا آنلاییب، گونئی آذربایجان تورکلرینین ایستکلرینی قبول ائتمهیه چالیشاجاق. دیگر قسمی ده گونئی آذربایجان تورکلری ایله داها چوخ دشمن اولوب بو دشمنلیغی آچیق شکیلده دیله گتیرهجک. هر ایکیسی ده میللی هدفه یئتیشمک اوچون نعمتدیر. حتی بو آیریشما اونلاری بیربیرینه قارشی دشمن ائدهجک و اونلار بیربیری ایله ساواشمایا باشلایا بیلرلر، بو دا میللی هدف اوچون بیر باشقا نعمت ساییلاجاق.
سون سؤز: ایران اوپوزیسیونو ایله ماسایا اوتوروب، ایش بیرلیغی ائدیب، پای آلماق ایستهین دوستلاریمزا بیر پیشنهاد ائدیرم. دوستلار باخین میللتیمیز سیزه بو قدر گؤزل بیر ملزمه وئردی. آرتیق اوتوردوغونوز هر ماسادا گوجلوسونوز، چونکو هر کس بیلیر کی آرتیق گونئی آذربایجان تورکلری بوش سؤزلر ایله گازا گلمز، آرتیق بو میلتین ایستکلری آچیق شکیلده منشورلاردا و بیانیهلرده منعکس اولماسا، بو میللت، اوپوزیسیونون هیچ بیر چاغریسینا قاتیلمایجاق. بو دا سیزین اوچون اتم بومباسی گوجونده بیر ملزمهدیر. هدف و ایلکهلری ملزمه ائتمک یئرینه، میللتیمیزین سیزه وئردیغی بو ملزمهیی استفاده ائدین و هیچ بیر شئیدن وازگئچمهیین.
Bir yanıt yazın