گئچن گونلرده سایین یوروش مهرعلیبیلینین استثمار و سؤمرگهنی آنلاتان چوخ گوزل و دهیرلی بیر یازیسینی اوخودوم. بئله بیلیمسل و تئوریک قونولارین یاییلماسی و تارتیشیلماسی، میللی حرکتیمیزه چوخ فایدالیدیر، خصوصا بئله یازیلار، میللی حرکتین اؤندرلری طرفیندن یازیلدیغیندا، داها اهمیتلیدیر و حرکتیمیزن دهرینلشمهسی و تئوریزه اولماسیندا چوخ بؤیوک نقشی اولا بیلر. بو مقالهنی اوخویوب، یاییب، بحثه قویوماغی هر کسه توصیه ائدیرم. بونون اوچون، سایین یوروش بییین بو دهیرلی یازیسینی اله آلیب، دوشونجهلریمی بیلدیرمهیی بیر وظیفه کیمی گؤرورم. دوشونجهلریمی بیلدیرمهدن اؤنجه، یوروش بییین قید ائتدیغی تئوریک چرچیوهنین خلاصهسینی بیان ائتمک اوچون، او یازیدا قید اولان سیاستلرین مصداقلارینی گونئی آذربایجان توپلوموندا بهلیرلهمهیه چالیشاجاغام. بونلارین جزئیاتینی یوروش بییین مقالهسینده اوخویا بیلرسینیز. سؤمورگهجی سیاستلرین مصداقلارینی یازدیقدان سونرا، یوروش بییین چیخاردیغی نتیجهلره، اؤز تنقیدی باخیشیمی و آنالیزیمی یازیاجاغام.
یوروشون مقالهسینده، بئش فرقلی سؤمورگهلشدیرمه سیاستی قید اولونوب، منجه اونلارین گونئی آذربایجان خالقینداکی مصداقینی آشاغداکی شکیلده خلاصه ائده بیلریک:
1.1 ذهنی سؤمورگهلشمه: بو سیاست نتیجهسینده، گونئ آذربایجاندا بعضیلری، بیز ایرانلیییق، بیز تورک دهییلیک و اصیل آریایی یعنی آذریییک، ایران مرز پر گهر، دنیانین ان یاخشی و قدیم اؤلکهسیدیر کیمی دوشونورلر.
1.2 بویون ایمه سیاستی یا دا اؤیردیلمیش آشاغیلیق: بو سیاست نتیجهسینده، گونئ آذربایجاندا بعضیلری، ایران داغیلارسا بیز آجیمیزدان اؤلهریک، نفتیمیز گازیمیز اولماسا بیز فلاکتده قالاریق، تورکلر دولت ایشلرینی بیلمز، تورک دیلی علمی و ادبی دیل دهییل، فارس دیلی دنیانین ان گوجلو دیلیدیر، حکومتین هر شئیدن خبری وار، هر شئی اونون کنترلو آلتیندا و هر شئی اونون پلانیدیر کیمی دوشونور.
1.3 اؤزونه قاتما سیاستی: بو سیاست ایله بیر طرفدن آسیمیله اولموش مذهبی گونئی آذربایجان تورکلرینی حکومته قاتمایا چالیشیب، دیگر طرفدن مذهبی اولمایان و حاکمیته مخالف اولانلاری دا یئنه ایرانچیلیق چرچیوهسینده، ایران اوپوزیسیونونا یئرلشدیرمهیه چالیشیرلار.چونکو ایران اوپوزیسیونو دا عینی ایران حاکمیتی کیمی سؤمورگهجی دوشونجهسیندهدیر و عینی سیاستلری حتی داها بئترینی یئریدمک ایستهییر. حاکمیته یا دا اوپوزیسونا قاتیلان هر بیر گونئی آذربایجانلی، سؤورگهجی سیستمه بیر قازانجدیر. ائله بو سیاست نتیجهسیندهدیر کی گونئی آذربایجان میللی حرکتینه قارشی دئییرلر کی، مشکل یالنیز جمهوری اسلامیدهدیر. گوزل ایرانیمیزی اونلار خارابا ائدیبلر، اونلاری ییخیب یئرینه داها یاخشی بیر حکومت گلسه، ایران ژاپن اولار. یعنی اؤزونه قاتما سیاستی ایله گونئی آذربایجان تورکونو، هم جمهوری اسلامییه قاتمایا چالیشیرلار، هم ده سلطنت طلب و جمهوریخواه اوپوزیسیونا. ایکیسینین ده سونوجو عینیدیر: سؤمورولموش انسانین سؤمورگهجییه قاتیلماسی.
1.4 توکئنیسم سیاستی: بو سیاست اساسیندا، سؤمورگهلشمهیی ذهنینده قبول ائتمیش گونئی آذربایجانلی تورکلری، بیر آذربایجان سمبولو کیمی نمایش ائتمهیه چالیشیرلار. طباطبایی، کسروی، خامنهای، خلخالی، رحیم شهریاری و … کیمی انسانلاری توکئنیزه ائدیب آذربایجان تورکونون سمبولو کیمی تانیددیرمایا چالیشیرلار. یالنیز اینسانلار قونوسوندا دهییل، کولتورل قونولاردا دا بو ایشی گؤرورلر، مثلا “سکینه دایی قیزی نای نای” کیمی ماهنیلاری آذربایجان موسیقیسینین سمبولو کیمی توکئنیزه ائتمهیه چالیشیرلار.
1.5 چورک قیرینتیسی سیاستی: بو سیاست اساسیندا، بعضی مطالبهلرین منحرف اولونموش حالینی یئرینه یئتیریرلر کی، هم مطالبهنی مبتذل ائتسینلر، هم ده او مطالبهنی وئرمیش کیمی گؤستریب، مشروعیت قازانسینلار. نمونه اولاراق، فاذری دیلینده اولان محلی تلویزیون کاناللاری، فرهنگستان آذربایجان، تورک دیلینده بعضی کیتاب و قازئتهلرین یاییلماسینا و آرا-سیرا بعضی دانشگاهلاردا ایکی ساعت تورک دیلینین تدریس اولونماسینا اشاره ائده بیلریک.
بو سیاستلرین ایلک اوچو، ایرانچی سؤمورگهچیلیغینین آنا پولیتیکالاریدیر و بو پولیتیکالار سایهسینده تورکلری تماما آسیمیله و یوخ ائتمهیه چالیشیرلار. سون ایکی سیاست، اصلینده ایلک اوچ پولیتیکایا مشروعیت یاراتماق اوچون استفاده ائتدیکلری تاکتیکلردیر.
یوروش بی، مقالهسینده اؤنجه بو بئش قونویو چوخ قاپساملی و بیلیمسل شکیلده آنلادیر. سونرا، سئچیم قونوسونا گئچیر و سون جمهور باشقانلیغی سئچیمینده، پزشکیانی دستکلهمهیی، قید ائتدیغی بئش سیاست چرچیوهسینده بیر-بیر دهیرلندیریر. بو دهیرلندیرمهلره گؤره، پزشکیانی دستکلهینلر، او بئش سؤمورگهجی سیاستین تاثیری آلتیندا پزشکیانی دستکلهییبلر و پزشکیانین گونئی آذربایجان خالقی طرفیندن ائتکین بیر شکیلده دستکلنمهسی، سؤمورگهجی سیاستلری داها دا گوجلندیرهجک. یوروش بی، پزشکیان و پزشکیان کیمیلرینی دستکلهمهیین یانلیش اولدوغونو و دوروم نه اولورسا اولسون، سئچیملره تحریم ائتمهغین دوغرو اولدوغونو ایرهلی سورور. حتی پزشکیانی دستکلهینلرین، ایرانین ذهنی سؤمورگهلشمه، بویون ایمه و اؤزونه قاتما سیاستی تاثیرینده حاکمیت کادرولارینا(پزشکیانا) بیر قورتاریجی کیمی اومود باغلاییب، اؤی وئردیکلرینی دوشونور.
البته کی گونئی آذربایجان تورکلری آراسیندا هر کس سؤمورگهجی سیاستلردن آز-چوخ ائتکیلهنیبدیر. یوروش بییین سؤزلرینده ده، کسینلیکله دوغرولوق پایی واردیر، آما اونلارین کمیت و کیفیتینی اؤلچمک امکانسیزدیر(ان آزیندان منیم اوچون). مثلا پزشکیانی دستکلهینلرین نه قدری اؤیردیلمیش آشاغیلیق حسی ایله، پزشکیانی بیر قورتاریجی کیمی گوروب، اونا اومود باغلادیغینی اؤلچمک امکانسیزدیر. بیر ده بو دهیرلی مقالهده، دیگر طرف یعنی پزشکیانا قارشی اولانلار(سئچیمی تحریم ائدنلر یا دا جلیلینی دستکلهینلر) قونوسونو هیچ اینجهلنمیر. پزشکیانا قارشی اولانلاری بو ایجهلنمهیه داخل ائتمهدیغی اوچون، آنالیز اکسیک قالیر و عدالتلی بیر سوسیولوژیک آراشدیرمادان اوزاخلاشیب، بللی سیاسی قرارلاری توجیه ائتک اوچون یازیلمیش بیر یازی سطحینه دوشور.
یوز ایللیک سؤمورگهجی سیاستلر نتیجهسینده، گونئی آذربایجان تورکلرینین چوخونون(حتی میللی فعاللارین بعضیسینین) فرقلی سطحلرده سؤمورگهجی سیاستلردن تاثیر آلدیغینی انکار ائتمک اولماز. بوگون بو سؤمورگهجی سیاستلر نتیجهسینده، گونئی آذربایجان خالقی ایکی گروها بؤلونموش کیمی گورونور: ایران مرز پر گهر دئینلر(سؤمورگهجی سیاستلریندن چوخ تاثیر آلمیشلار) و جان آذربایجان دئینلر(سؤمورگهجی سیاستلردین تاثیر آلمامیشلار یا دا چوخ آز تاثیر آلمیشلار).
1- ایران مرز پر گهر دئینلر: ایرانین سؤمورگهچی پولیتیکالارینا اویموش و آسیمیله اولموش، اؤزونو ایران و آریایی بیلیب، فارس دیلینی منیمسهییب، تورکلوغو آشاغیلیق بیلب، ایرانچیلیغا قاتیلمیش، ایران حاکمیتی یا دا اوپوزیسیونونا باغلیلیق حس ائدن، جمهوری اسلامی طرفداری یا دا سلطنت طلب-جمهوری خواه اوپوزیسیونلارین طرفداری اولانلار
2- جان آذربایجان دئینلر: ایرانین سؤمورگهچی پولیتیکالاریندان داها آز تاثیر آلمیش، آسیمیله اولمامیش یا دا داها آز آسیمیله اولموش، بو سیاستلر قارشی اولان، تورکلوغونه و آذربایجانا باغلی اولان، فارس دیلینی و آریاییچیلیغی منیمسهمهیین، گونئی آذربایجانین و تورکلوغون منافعینی هر شئیین اوستونده گؤروب، جمهوری اسلامی و اوپوزیسیون دیشیندا اوچونجو بیر یول آختارانلار.
یوروش بیین یازدیغی بو دهیرلی مقالهنین تکمیل اولونماسی اوچون، پزشکیانا قارشی توتومو دا دهیرلندیرمهلی ییک. پزشکیانا قارشی توتوملارین(تحریم یا دا جلیلینی دستکلهمک) دا، نه قدر سؤمورگهجی سیاستلردن ائتکیلندیغینی آنلادیغیمیزدا، هانکیسی(پزشکیانی دستکلهمک یا دا پزشکیانا قارشی اولماق) گونئی آذربایجان میللی حرکتینه داها چوخ فایدالی و داها دوغرو اولدوغونو دا آنلایا بیلهریک. بونون اوچون هر کس اوز دوشونجه و مشاهدهلری ایله آشاغیداکی ایکی سورویا جواب وئرمهیه چالیشسا، اصیل سوالین جوابی دا آیدینلاشاجاق:
الف-گونئی آذربایجان تورکلرینین هانکی گروهو پزشکیانی دستکلهدی؟ هانکی گروهو اونا قارشی چیخدی؟ ایران مرز پز گهر دئینلر می پزشکیانی دستکلهدی؟ یوخسا جان آذربایجان دئینلر می؟
ب- او سئچیم و گونئی آذربایجان تورکلرینین یوغون شکیلده پزشکیانی دستکلهمهسی، سؤمورگهچی سیاستین گوجلنمهسینه می سبب اولدو؟ یوخصا ضعیفلنمهسینه می؟ تحریم تاکتیکی باشاریلی اولسایدی و گونئی آذربایجاندا قاتیلیم اورانی و پزشکیانین اوی اورانی ایرانین میانگینی ایله برابر اولسایدی، ایران مرز پرگهر دوشونجهسی داها چوخ گوجلهنهجکدی؟ یوخسا جان آذربایجان دوشونجهسیمی؟
البته بورادا آماجیم هر طرفده چوخونلوغون هانکی گروهدا اولدوغونو دوشونمکدیر. یوخسا، کیمسه بوتون پزشکیانا قارشی اولانلار، ایران مرز پر گهر دئینلردیر یا دا عکسینی ادعا ائده بیلمز. خصوصا بورادا سیاسی اکتیویستلر(میللی فعاللار) سؤز قونوسو دهییل. سیاسی آکتیویستلر بئله بیر سوسیال آراشدیرمانین قونوسو اولماز، چونکو اونلار بیلینجلی شکیلده، شخصی یا دا جناحی منافع و دوشونجهیه تابع اولارلار. بورادا سؤز قونوسو، نورمال خالقیمیزدیر. یعنی سیرادان بیر اکینچی، ایشچی، معلم، نظامی، ایشسیز، ائو خانیمی و … انسانلاردان سؤز گئدیر. نرمال خالقیمیزین ایچینده هانکی گروهون چوخونلوغو پزشکیانی دستکلهدی؟ هانکی گروهون چوخونلوغو جلیلی یا دا تحریمدن یانا اولدو؟ عینی شکیلده، پزشکیانی دستکلهمک می سومورگهجی پولیتیکالارینی داها چوخ چوروتدو؟ یوخسا قارشی اولوب تحریمه قاتیلماقلا داها چوخ چوروده بیلردیک؟
بو سواللارین جوابینی تاپماق اوچون، اؤلچوله بیلیر هیچ بیر کریتریمیز یوخدور. هر کس یالنیز اؤز مشاهده و آنالیزینه دایاناراق قرار وئره بیلر. من اؤز مشاهدهم اساسیندا فیکریمی دئمهلییم، بو دا منیم دئدیکلریمین عکسینی دئینلرین سوزلرینین و قرارلارینین یانلیش اولدوغو آنلامینا گلمز. چونکو اونلارین مشاهدهلری و آنالیزلری، منیمله تماما فرقلی اولوب، تماما فرقلی بیر تاکتیک سئچمیش اولا بیلیرلر. قیساجاسی بورادا آماجیمیز گناه گئچیسی آختارماق دهییل، آماجیمیز داها دهرین دوشونوب بیربیریمیزی آنلاماقدیر.
منجه ایرانین، جمهور باشقانی سئچیمینده، خالقیمیزین ایران سؤمورگهچی سیاستلریندن داها چوخ ائتکیلنمیش، ایرانی و فارس دیلینی منیمسهین، ایران مرز پر گهر دئین گروهو، چوخونلوقلا سئچیمی تحریم ائتدیلر(اوپوزیسیون طرفدارلاری) یا دا جلیلینی دستکلهدیلر(جمهوری اسلامی طرفدارلاری). آما جان آذربایجان دئییب، تورکلوغه و آذربایجان منافعینه دهیر وئرن، ایران حاکمیتی و اوپوزیسونونا مخالف اولان و اوچونجو بیر یول آختارانلارین چوخونلوغو پزشکیانی دستکلهدیلر. عینی شکیلده گونئی آذربایجان، ایرانین اورتالاماسیندان معنیلی فرق ایله سئچیمه قاتیلماسی، پزشکیانی دستکلهمهسی و تورکلوق آدینا بیر اتمسفر و ظفر آلقیسی یارانماسی، ایرانچیلیق و سؤمورگهچی سیاستلرین چورومهسینه یاردیمجی اولدو و گونئی آذربایجان میللی حرکتینی بیر آددیم ایلهری داشیدی.
سایین یوروش بی، اؤز مشاهده و آنالیزینه دایاناراق بونون عکسینی ادعا ائدیر. دئمک کی اونون مشاهدهلرینه گؤره، خالقیمیزین ایران مرز پر گهر دئین گروهو پزشکیانی دستکلهدی، جان آذربایجان دئین گروهو دا تحریم ائتدی. عینی شکیلده یوروش بیه گؤره، پزشکیانین تورکلوق و آذربایجان سؤیلهمی ایله، آذربایجان تورکلری طرفیندن گوجلو دستکلنمهسی و ایرانین دیگر بؤلگهلریندن فرقلی قاتیلیمی، گونئی آذربایجاندا ایرانچیلیق و سؤمورگهجی سیاستلرینی گوجلندیردی. یازارا گؤره، تحریم باشاریلی اولسایدی و آذربایجان دا، ایرانین میانگینی قدر تحریم ائتسهایدی و جلیلی جمهور باشقانی اولسایدی، ایرانین سومورگهجی سیاستلری داها چوخ چورویهجکدی.
بیربیرینه قارشی اولان بو ایکی دوشونجهنی هیچ بیر شکیلده اثبات ویا رد ائتمک اولماز. بونو یالنیزجا اوخویانلارین مشاهیده و آنالیزلرینه بوراخیرام. اونلار اؤز مشاهده و آنالیزلری اساسیندا هانکیسینین حقیقته داها یاخین اولدوغونو سئچرلر.
یازار مقاله نین دوامیندا، توکئنیسم و چورک قیرینتیسی آدلی سؤمورگهجی سیاستلری اله آلیب، یئنه ده پزشکیانی دستکلهینلری او سیاستلر چرچیوهسینده دهیرلندیریر. بو ایکی قونودا دا یازارین دوشونجهلریندن فرقلی دوشونورم.
توکئنیسم سیاستی:
ایران سؤمورگهجی سیستمی، سؤمورگهلشمهیی ذهنینده قبول ائتمیش گونئی آذربایجانلی تورکلردن بعضیلرینی سئچیب، آذربایجانین بیر سمبولو کیمی نمایش ائتمهیه چالیشیر. سید جواد طباطبایی، میر حسین موسوی، کسروی، خامنهای، خلخالی، رحیم شهریاری و … کیمی انسانلاری توکئنیزه ائدیب آذربایجان تورکونون سمبولو کیمی تانیددیرمایا چالیشدیغینی هامیمیز بیلیریک. بو سیاست اساسیندا، پزشکیان قونوسونا گهلیرسک، بو سورویا جواب تاپمالیییق: سؤمورگهچی سیستم پزشکیانی توکئنیزه ائدیب، تورک و آذربایجان سمبول ائتمک اوچون مو اونا صلاحیت وئردی؟
منجه پزشکیانین گونئی آذربایجاندا بو قدر دستک گؤرهجهغینی اونلار خیال بئله ائتمیردیلر. اصلاحات جبههسی، پزشکیانی اوچ آدایدان بیری اعلان ائتدیکدن سونرا، حاکمیت پزشکیانا صلاحیت وئردی. آماجی دا اصلاحاتچیلارین قاتیلمایاجاغینی بیلهرک، شکست یئمیش بیر اصلاحاتچی سمبولو یارادیب، اصلاحات جبههسینی تماما یوخ ائدیب، انحصاری قدرت ایله داها آجیماسیز بیر دیکتاتور سیستمینه گئچمکدی. ظریفی ده اونون اوچون پزشکیانین یانینا سوخوب هر شئییی جبهه اصلاحات آدینا یوروملامایا چالیشدیلار. یعنی پزشکیان تورکلوق و آذربایجانین سمبولو دهییل و اولمامیشدی. اولسا بئله، هر سمبول اولموش انسانی، حاکمیتین توکئنیزه ائتدیغی سمبول آدلاندیرماق یانلیشدیر. حاکمیت اونو آذربایجان سمبولو اولماق اوچون توکئنیزه ائتمهیی پلانلامامیشدی و بوتون سعییی ده، اونون سمبول اولماغینین قارشیسینی آلماقدیر.
بونلارا راغما گونئی آذربایجان تورکلری پزشکیانی دستکلهیه رک، اویونو دهییشدیریب، ایرانین سیاسی پارادیگماسینی اصولگرا-اصلاحطلبدن، تورک-فارس پارادیگماسینا چئویردیلر. پزشکیانین معنیلی شکیلده آذربایجانین اویلاری ایله چخماسی، تورکون وارلیغینی، آغیرلیغینی و گوجونو گؤستریب، ایللردیر آشاغیلانمیش و چارهسیزلیغه بوراخیلمیش بیر میلتده ظفر آلقیسی یارادیب، میلتین اؤزگووهنین یوکسلتدی. بو اوزون یولو(پزشکیانین آدای اولماسی، جبهه اصلاحاتین اونو اوچ کیشیدن بیری معرفی ائتمهسی، صلاحیت آلماسی، بعضی میللی فعاللارین مخالفتینه راغما آذربایجانین تورکلوک هاواسی ایله قایناییب اونو دستکلهمهسی و سونوندا آذربایجانین اویلاری ایله چیخماسی) بوراخین جمهوری اسلامینی، دونیانین هیچ بیر گوجلو دهرین دولتی بئله پلانلایاماز. او زامان ندن بعضی دوستلاریمیز، دونیانین ان باشاریسیز و آبتال حاکمیتینی، قادر مطلق کیمی گؤرور و هر شئیی اونون پلانی و اونون کنترلوندا اولدوغونا اینانیر؟ ندن اؤز میلتلرینین باشاریسینی کوچومسهییب، سؤمورگهجی حاکمیتین باشاریسی اولاراق قید ائدیرلر؟ اؤیردیلمیش آشاغیلیق تام معناسی ایله بو دهییل می؟
چورک قیرینتیسی سیاستی:
بو سیاست ایله، سؤمورگهجی سیستم، بعضی مطالبهلرین منحرف اولموش حالینی یئرینه یئتیریر کی، هم مطالبهنی مبتذل ائتسین، هم ده او مطالبهنی وئرمیش کیمی گؤستریب، مشروعیت قازانسین. نمونه اولاراق، فاذری دیلینده اولان محلی تلویزیون کاناللاری، فرهنگستان آذربایجان، تورک دیلینده بعضی کیتاب و قازئتهلرین یاییلماسی و آرا-سیرا بعضی دانشگاهلاردا ایکی ساعت تورک دیلینین تدریس اولونماسینا اشاره ائده بیلریک.
پزشکیانی دستکلهین گونئی آذربایجان تورکلرینین بیر قیسمی، چورک قیرینتیسی سطحینده ایستکلر ایله پزشکیانی دستکلهدیغینی انکار ائتمک اولماز. آما سؤمورگهجی سیاستینی بیلن هر کس، بیلیر کی، بیر سؤمورگه سیستمی، بیر آوانتاژ وئرمک ایستهسه ده، اونو مستعمره خالقین حقیقی کیملیغینی تمثیل ائدن بیرینین الی ایله وئرمز، اونو اؤز الی ایله وئرر. نئجه کی پزشکیان قونوسوندا بونا شاهدییق، مستعمرهچی سیستم ان کیچیک بیر آوانتاژین پزشکیان طریقی ایله وئریلمهسینه قارشیدیر و قارشیسینی آلمایا چالیشیر. ذاتا پزشکیاندا دا، چورک قیرینتیسی وئرمک هوسی گؤرونمور. قیرینتی پئشینده اولانلار بیلیرلر کی سؤمورگه ذهنیته یاخینلاشاراق داها چوخ قیرینتی الده ائده بیلرلر. پزشکیان بیلهرک یا دا بیلمهیهرک، سؤمورگهجی فلسفهنین چورومهسینه یاردیمجی اولور. تورکو دانیشدیغیندا اخطار آلدیغینی آشکارجا بیلدیرمک، پیشهورینین آدینی چکمک، “فارسجا دانیشاق کی آمریکا دا آنلاسین” دئمک، “آلدیغیم بوتون قرارلار، رهبرین نظریدیر” دئمک و بونا بنظر ایشلر بیر چؤرک قیرینتیسی ماهیتی داشیمیر. بو سؤزلر یوز ایلدیر قورولموش ایرانچیلیق سؤمورگه سیاستلرینین چورومهسینه سبب اولور، گوجلنمهسینه دهییل.
سون اولاراق بونو دئمک استهییرم، بو سوسیولوژیک تانیملاری و سیاستلری بیلمک چوخ اؤنملیدیر و میللی حرکتیمیزین گوجلنمهسینه سبب اولار. آنجاق، بونلاری بیلیب، دشمنین اویونونو آنلاییب، اونون اویونونا قارشی اویون قورمالیییق. یوخسا بونلاری بیلدیکدن سونرا، بوتون حادیثهلری بو سیاستلر اساسیندا دهیرلندیریب، سونرا دا بو سؤمورگهجینین اویونودور دئییب، کناردا دورماق ایله میللی حرکتی ایلری گؤتورمک اولماز.
سؤمورگهچی سیستم، بعضی ساحهلرده بیر آددیم گئری چکیلیرسه، البته کی اؤزونو قوروماق اوچون گئری چکیلیر، بیزیم آلا گؤزوموزه عاشق اولدوغو اوچون دهییل. بونو آنلاماق اوچون ده، پروفسور اولماغا احتیاج یوخدور. سیستم هر هانکی بیر ساحهده، بیر آددیم گئری آتیبسا، کسینلیکله میلی فعاللارین فداکارلیغی و خالقیمیزین بصیرتی قارشیسیندا، اؤزونو قوروماق اوچون گئری چکیلمهیه مجبور اولوبدور. اونون گئری چکیلدیغی ساحهنی دولدوروب داها دا چوخ گئری ایتهلهمهیه مجبور ائتمک ده، هر ساواشین نورمال سورهجیدیر. بئله بیر دورومدا، بوشلوغو دولدورماق یئرینه، گئری چکیلیب، میدانی دشمنلره بوراخماق دا، میللی فعاللارین فداکارلیغینا سایقیسیزلیقدیر. منجه آماجیمیز آزادلیق، عدالت، میللی حکومت ایسه، هر فرصتی(سئچیم، ساواش، خالق عصیانی و …) دهیرلندیریب، میللی حرکتی بیر آددیم ایلهری گؤتورمهلیییک. بونون اوچون ایللا کی قاتیلمالیییک دئمیرم. قاتیلماقدا مشروع حقیمیزدیر، قارشی اولماقدا. هانکی تاکتیک گونئی آذربایجان میللی حرکتینی داها چوخ ایلری گوتورهجکسه اونو سئچمهلیییک. آی بو رژیمین اویونودور، اؤزونو قوروماق اوچون بونو ائدیر، رژیمه مشروعیت قازاندیرار، بو قاتلدی، او سینه ووراندی، … کیمی اوپوزیسیونون پروپاگاندالارینی تکرار ائدیب، کناردا دورماغی دا دوغرو بیلمیرم.
Bir yanıt yazın