دی آیی آیاقلانماسی و ایران رژیمینین اؤز خالقینی قتل عام ائتمهسی، هامیمیزین و بوتون انسانلیغین اورگینده بویوک یارالار آچدی. بیز گونئی آذربایجان میللی حرکتی اولاراق هر حادثهنی بیر فرصت کیمی دهییرلندیرمک ایله برابر، هر حادثهدن درس آلیب بیر شئیلر اؤرگنمهلیییک. یوخسا هدفه دوغرو بیر آددیم آتمادان یئریمیزده قالاریق، حتی گئری گئدریک. منیم اوچون بو حادثه باشدان سونا قدر بیر درسدیر و بو حادثهدن آلدیغیم درسلری سیزینله پایلاشماق ایستهییرم:
1- ایراننین دموکراتیک بیر دولت اولما احتمالی صفردیر. بو جغرافیادا یالنیز گونئی آذربایجان تورکلرینده، دموکراتیک و انسانی اصوللارا احترام قویما فرهنگی و قابلیتی وار. باشقا میللتلر دموکراسی اصوللریندن یوزلرجه ایل اوزاقدیرلار. اگر دموکراسی ایستهییریک، گونئی آذربایجانی مستقل ائدیب اورادا اؤز دموکراسیمیزی قورمالیییق. باشقا چارهسی یوخدور.
2- حقوق بین الملل آدلی بیر شئی یوخدور. حتی قارداش میللتلر و متفقلر دییه ده بیر شئی یوخدور. هر اؤلکهنین و هر میللتین، میللی منافعی وار و یالنیزجا اؤز میللی منافعی اساسیندا دوشونوب قرار وئرر. او میللی منافعلر ده عمومیتده گوجدن یانا تعریف اولار. هر حرکت اؤز پایگاه اجتماعی(تابان)سینی بؤیودوب، گوجلندیریب، سیاسی گوجه چئویرسه، او حرکتی باشقا دولتلر و میللتلر دستکلر، چونکو اونو بیر گوج گؤرر و میللی منافع ده هر زامان گوجدن یانا اولار. بیز ده یالنیز اؤز میللتیمیز، یعنی گونئی آذربایجان تورکلرینه دایانمالیییق و اؤز میللتیمیزین میللی منافعینی اوچون، اؤز تابانیمیزی بؤیودوب، گوجلندیریب، سیاسی گوجه چئویرمهلیییک. آنجاق او زامان باشقا دولتلرین حمایتینی قازانا بیلریک. بو اولمادان نه قدر لوبیچیلیک ائتسک ده هیچ بیر فایداسی اولمایاجاق.
3- “انقلاب ائدیب، حکومتی ییخاق، سونرا حاقلاریمیزی آلاریق” تئزی تامامن یانلیشدیر. انقلابدان سونراکی حکومت نه اولورسا اولسون، تاریخینین ان گوجلو و بیرحم وضعیتینده اولار. او وضعیتده انقلاب تئزینین خارجینده هیچ بیر ایستک آغیزا گتیریلمز. بو یالنیز ایران یا دا فارسلارا مخصوص بیر شئی دهییل، دنیانین هر یئرینده و هر میللت اوچون روانشناسی انقلاب بئلهدیر و بئله اولاجاق. بونو اؤز گؤزوموزله بو نئچه گونده گؤردوک، ههله هیچ بیر شئی یوخدو، بیر چوخ نرمال انسان کی دونهنه قدر پهلوی دشمنی ایدی، جو انقلابی ایله پهلویچی اولموشدو و دموکراسی یا دا باشقا حقلردن دانیشانلاری سوسدورمایا چالیشیردی.
4- میللتیمیزی دوغرو تانیمالیییق. هر گون بو میللتین کتابینی اوخومالیییق. گونئی آذربایجان تورکلرینی سادهشکیلده تعریف ائتسک، ایکی گروهدان تشکیل اولور، “جان آذربایجان دئینلر” و “ ایران مرز پر گهر دئینلر” . گونئی آذربایجان میللی حرکتینین تابانی(پایگاه اجتماعیسی) جان آذربایجان دئییب، آذربایجان و تورکلوغه اهمیت وئرنلردیر. میللی حرکت اولاراق اؤز تابانیمیزین دوشونجهلرینی و توتوملارینی دوغرو اوخومالیییق. هیچ بیر قرار و توتوموموز اؤز تابانیمزین توتومونا قارشی اولمامالیدیر، یوخسا باشاریسیز اولار و تابانیمیزین حمایتینی الدن وئرریک. ایران مرز پر گهر دئینلری ایچیمیزه چکمهیه چالیشمالیییق و اونون اوچون بعضی تاکتیکی قرارلار دا آلابیلریک، آما بو قرارلار هیچ بیر شرطده اؤز تابانیمیزین توتومونا قارشی اولمامالیدیر. میللی حرکت نه بیر دولتدیر کی بوتون میللتی تمثیل ائده، نه ده بیر روشنفکری حرکتدیر کی میللتین توتومونا باخمادان اؤز فیکرینه گؤره دوغرو اولانی ائده. بو بیر میللی حرکتدیر، بللی تابانی وار و او تابانی دوغرو اوخویوب، اونا گؤره حرکت ائتمهلیدیر
Bir yanıt yazın